2020లో ప‌వ‌న్ రీ ఎంట్రీ ఖాయ‌మైపోయిది. ఓ వైపు పింక్ స్క్రిప్టు ఫైన‌లైజ్ అవుతోంది. మ‌రోవైపు క్రిష్ సినిమా కి సంబంధించిన ప‌నులు కూడా మొద‌లైపోయాయి. ఇప్పుడు రామ్ చ‌ర‌ణ్ సైతం ప‌వ‌న్ క‌ల్యాణ్ కోసం ఓ క‌థని అన్వేషిస్తున్నార‌ని తెలుస్తోంది. కొంత‌మంది యువ ర‌చ‌యిత‌లు, ద‌ర్శ‌కులు చెబుతున్న క‌థ‌ల్ని చ‌ర‌ణ్ వింటున్నాడ‌ట‌. ఇది త‌న కోసం కాదని, ప‌వన్ కోస‌మ‌ని స‌మాచారం. కొణిదెల ప్రొడ‌క్ష‌న్స్ ప‌తాకంపై ఇప్ప‌టి వ‌ర‌కూ రెండు సినిమాలొచ్చాయి. ఖైదీ నెం.150, సైరా చిత్రాల్ని నిర్మించారు. చిరు – కొర‌టాల సినిమాలోనూ ఈ సంస్థ‌కు భాగ‌స్వామ్యం ఉంది. ఈ సంస్థ కేవ‌లం చిరంజీవి చిత్రాల‌కు మాత్ర‌మే ప‌రిమితం అని చ‌ర‌ణ్ ఇది వ‌ర‌కు ఓ సంద‌ర్భంలో చెప్పాడు. అయితే బాబాయ్‌తోనూ చ‌ర‌ణ్ సినిమా తీయాల‌ని భావిస్తున్నాడ‌ని స‌మాచారం.

కొణిదెల ప్రొడ‌క్ష‌న్‌లో ప‌వ‌న్ న‌టించ‌డం ఒక ఎత్త‌యితే, ప‌వ‌న్ క‌ల్యాణ్ క్రియేటీవ్ వర్స్క్‌లో చ‌ర‌ణ్ ఓ సినిమా చేయ‌బోవ‌డం మ‌రో ఎత్తు. ‘బాబాయ్ ప్రొడ‌క్ష‌న్‌లో నేను ఓ సినిమా చేస్తా’ అని ఇది వ‌ర‌కే చ‌ర‌ణ్ ప్ర‌క‌టించాడు. ఈ రెండు సినిమాల్నీ 2020లోనే ప‌ట్టాలెక్కించాల‌ని చ‌ర‌ణ్ చూస్తున్నాడు. కొణిదెల ప్రొడ‌క్ష‌న్‌లో ప‌వ‌న్ న‌టించినా, ప‌వ‌న్ నిర్మాత‌గా చ‌ర‌ణ్ సినిమా చేసినా, ఆ క్రేజ్ మామూలుగా ఉండ‌దు. కాక‌పోతే అందుకు సంబంధించి క‌థ‌లే సెట్ అవ్వాలి. త‌న వంతు ప్ర‌య‌త్నంగా, ‘ఆర్‌.ఆర్‌.ఆర్‌’ సినిమా చేస్తూనే, ప‌వ‌న్ కోసం క‌థ‌ల్ని వెదికే ప‌నిలో ప‌డ్డాడు చ‌ర‌ణ్‌.