ఈమ‌ధ్య థ్రిల్ల‌ర్ జోన‌ర్‌కి మాంచి గిరాకీ ఏర్ప‌డింది. ఇది వ‌ర‌కు చిన్న హీరోలు, కొత్త హీరోలే ఇలాంటి క‌థ‌లు ఎంచుకునేవారు. ఇప్పుడు ఓ స్థాయి ఉన్న హీరోలూ.. చేసేస్తున్నారు. ఇస్మార్ట్ శంక‌ర్‌తో ఓ సూప‌ర్ హిట్ అందుకున్న రామ్‌… తొలిసారి థ్రిల్ల‌ర్ క‌థ‌ని ఎంచుకున్నాడు. అదే రెడ్‌. కిషోర్ తిరుమ‌ల ద‌ర్శ‌క‌త్వం వ‌హించిన చిత్ర‌మిది. టీజ‌ర్ విడుద‌లైంది.

రామ్ ఇందులో రెండు పాత్ర‌ల్లో క‌నిపించ‌బోతున్నాడు. ఒకేలా ఉండే ఇద్ద‌రి.. (ఆదిత్య‌, సిద్దార్థ‌) మ‌ధ్య ఉన్న సంఘ‌ర్ష‌ణే ఈ చిత్రం. ఓ క్రైమ్ ఇన్వెస్టిగేష‌న్ నేప‌థ్యంలో సాగ‌బోతోందీ చిత్రం. ఎవ‌రు ఎవ‌రిని ఎందుకు ఇరికించాల‌ని చూశాడ‌న్న‌ది తెర‌పై చూసి తెలుసుకోవాలి. టీజ‌ర్‌లో చూపించిన షాట్లు, ఆర్‌.ఆర్‌, విజువ‌ల్స్‌… ఇవ‌న్నీ ఈ సినిమాపై న‌మ్మ‌కాన్ని పెంచుతున్నాయి. ఇస్మార్ట్ శంక‌ర్ సినిమాలోని గెట‌ప్‌లోనే రామ్ క‌నిపిస్తున్నా.. రెండు పాత్ర‌ల మ‌ధ్య వైవిధ్య స్ప‌ష్టంగా తెలిసిపోతోంది. నివేదా పేతురాజ్ పోలీస్ అధికారి పాత్ర‌లో న‌టిస్తోంది. ఆదిత్య‌, సిద్దార్థ్‌కీ నివేదా పాత్ర‌కీ ఉన్న సంబంధం ఏమిట‌న్న‌ది ఆస‌క్తిక‌రం. మొత్తానికి రెడ్ టీజ‌ర్‌… రేసీ థ్రిల్ల‌ర్‌ని చూడ‌బోతున్నామ‌న్న న‌మ్మ‌కం క‌లిగించింది. ఫైన‌ల్ అవుట్‌పుట్ ఎలా ఉంటుందో చూడాలి.