ఈ ఏడాది ‘ఆవేశం’ తో మంచి హిట్ అందుకున్నారు ఫహద్‌ ఫాజిల్‌. జీతూ మాధవన్‌ దర్శకత్వంలో రూపొందిన ఈ యాక్షన్‌ కామెడీ ఫిల్మ్‌ బాక్సాఫీసు వద్ద సత్తా చాటింది. ఈ సినిమాని తెలుగులో రీమేక్ చేస్తారని గతంలో వార్తలు వచ్చాయి. హీరో రవితేజ ఈ సినిమా రీమేక్ హక్కులని తీసుకున్నారని తాజా సమాచారం. రవితేజకి సొంతగా నిర్మాణ సంస్థ వుంది. ఈ సినిమాలో ఆయన హీరోగా చేస్తారా ? లేదా కేవలం నిర్మాణం చేస్తారా? అనేది తెలియాల్సివుంది.
‘ఆవేశం’ ఓ వైవిధ్యమైన కథే. ఓ ముగ్గురు కాలేజీ స్టూడెంట్లు, తమ సీనియర్లను కొట్టించడానికి లోకల్ గ్యాంగ్‌స్టర్‌ అయిన రంగా (ఫహద్‌ ఫాజిల్‌)ను ఆశ్రయిస్తారు. ఆ క్రమంలో రంగాకి, విద్యార్ధులకి మంచి స్నేహం ఏర్పడుతుంది. అయితే ఓ దశ దాటిన తర్వాత రంగా క్యారెక్టర్ కారణంగా ముగ్గురు విద్యార్ధులు చిక్కుల్లో పడతారు. తర్వాత ఏం జరిగిందనే భలే ఆసక్తికరంగా వుంటుంది. ముఖ్యంగా ఫహద్‌ ఫాజిల్‌ క్యారెక్టరైజేషన్ ఈ కథలో స్పెషల్ ఎట్రాక్షన్. తెలుగులో ఆ క్యారెక్టర్ ఎవరు చేసినా విలక్షణమైన పాత్రగా నిలవడం ఖాయం.
