హిట్టూ, ఫ్లాపుల‌తో సంబంధం లేకుండా వ‌రుస‌గా సినిమాలు చేసుకొంటూ వెళ్తుంటారు ర‌వితేజ‌. ఆయ‌న ఇప్పుడు `మాస్ జాత‌ర‌` రెడీ చేస్తున్నారు. ర‌వితేజ పుట్టిన రోజు సందర్భంగా టీజ‌ర్ విడుద‌లైంది. సితార ఎంట‌ర్‌టైన్మెంట్స్ సంస్థ ఈ చిత్రాన్ని రూపొందిస్తోంది. ఇప్పుడు ఇదే సంస్థ‌లో ర‌వితేజ మ‌రో సినిమా చేయ‌డానికి సిద్ధ‌మ‌య్యార‌ని తెలుస్తోంది. ఈ చిత్రానికి క‌ల్యాణ్ శంక‌ర్ ద‌ర్శ‌క‌త్వం వ‌హించ‌బోతున్నారు. MAD సినిమాతో ఆక‌ట్టుకొన్న ద‌ర్శ‌కుడీయ‌న‌. ఈ సినిమా సితార‌కు మంచి లాభాల్ని తెచ్చి పెట్టింది. ఇప్పుడు MAD 2 కూడా చేస్తున్నారు. చిత్రీక‌ర‌ణ దాదాపుగా పూర్త‌య్యింది. త్వ‌ర‌లోనే విడుద‌ల చేస్తారు. ఈలోగా క‌ల్యాణ్ శంక‌ర్ మ‌రో క‌థ రెడీ చేయ‌డం, అది ర‌వితేజ‌కు వినిపించ‌డం జ‌రిగిపోయాయి. మాస్ జాత‌ర అయిన వెంట‌నే ఈ సినిమా మొద‌ల‌య్యే అవ‌కాశం ఉంది.

MAD కాలేజీ క‌థ‌. ఎంట‌ర్‌టైన్‌మెంట్ బాగా వ‌ర్క‌వుట్ అయ్యింది. పాట‌లూ ప్ల‌స్ అయ్యాయి. ఎలాంటి అంచ‌నాలూ లేకుండా థియేట‌ర్ల‌కు వెళ్లారు. వాళ్ల‌కు న‌చ్చేసింది. ర‌వితేజ సినిమా అంటే కొన్ని అంచ‌నాలు ఉంటాయి. స్టార్‌ని ఈ కొత్త ద‌ర్శ‌కుడు ఎలా హ్యాండిల్ చేస్తాడో చూడాలి. MAD 2 కూడా వ‌ర్క‌వుట్ అయితే ద‌ర్శ‌కుడిగా క‌ల్యాణ్ శంక‌ర్‌కు మంచి కాన్ఫిడెన్స్ వ‌స్తుంది. ర‌వితేజ సినిమాకు అది హెల్ప్ అవుతుంది. ఈ కాంబో గ‌నుక సెట్ అయితే.. 2026 సంక్రాంతికి ఈ చిత్రాన్ని విడుద‌ల చేయాల‌నుకొంటున్నారు.