మూడు పాత్ర‌ల్లో వైవిధ్యం చూపించి త‌న అభిమానుల్ని ఆక‌ట్టుకొన్నాడు ఎన్టీఆర్‌. జై.. ల‌వ‌.. కుశ‌గా ఎన్టీఆర్ చూపించిన ప్ర‌త్యేక‌త‌, అందులో త‌న న‌ట‌నే జై ల‌వ‌కుశ చిత్రాన్ని నిల‌బెట్టింది. ఇప్పుడు ర‌వితేజ కూడా అదే బాట‌లో న‌డ‌వ‌బోతున్నాడ‌ని టాలీవుడ్ టాక్‌. ర‌వితేజ – శ్రీ‌నువైట్ల కాంబినేష‌న్‌లో ఓ చిత్రం రూపుదిద్దుకోనుంది. ‘దుబాయ్ శీను’ త‌ర‌వాత‌.. వీరిద్ద‌రి క‌ల‌యిక‌లో రాబోతున్న సినిమా ఇది. ర‌వితేజ – శ్రీ‌నువైట్ల వేవ్ లెంగ్త్స్ బాగా కుదురుతాయి. ఇద్ద‌రూ కామెడీని న‌మ్ముకొన్న‌వాళ్లే. కాబ‌ట్టి ఈ సినిమాపై ఆశ‌లు పెట్టుకోవొచ్చు. ఈలోగా ఈ సినిమాకి సంబంధించిన ఓ ఆస‌క్తిక‌ర‌మైన విష‌యం బ‌య‌ట‌కు వ‌చ్చింది. ఈ సినిమాలో ర‌వితేజ మూడు పాత్ర‌ల్లో క‌నిపించ‌బోతున్నాడ‌ని, ముగ్గురూ అన్న‌ద‌మ్ములే అని టాక్‌. ‘జై ల‌వ‌కుశ‌’లో కూడా అంతే. ఎన్టీఆర్ మూడు పాత్ర‌లు చేశాడు. జై. ల‌వ‌. కుశ ముగ్గురూ అన్న‌ద‌మ్ములే. అయితే జైలో నెగిటీవ్ కోణాలు క‌నిపిస్తాయి. ర‌వితేజ పాత్ర‌లు మూడు పాజిటీవ్ గానే ఉండ‌బోతున్నాయ‌ని తెలుస్తోంది. ప్ర‌స్తుతం ట‌చ్ చేసి చూడు, రాజా ది గ్రేట్ సినిమాల‌తో బిజీగా ఉన్నాడు ర‌వితేజ‌. 2018లో ఈ సినిమా సెట్స్‌పైకి వెళ్తుంది. మిగిలిన వివ‌రాలు త్వ‌ర‌లో తెలుస్తాయి.