నందమూరి తారక రామారావు శతజయంతి సందర్భంగా కేంద్ర ప్రభుత్వం విడుదల చేసిన రూ.100 స్మారక నాణెం అమ్మకాలు కొత్త రికార్డు సృష్టించాయి. హైదరాబాద్ మింట్ కాంపౌండ్ లో ఎన్టీఆర్ స్మారక నాణెం తయారు చేస్తున్నారు. మార్కెట్లోకి విడుదలైన 2 నెలల్లోనే 25 వేల నాణేలు అమ్ముడయ్యాయి. దేశంలోనే ఇది సరికొత్త రికార్డని మింట్ అధికారులు ప్రకటించారు.
‘దేశంలో స్మారక నాణేల విడుదల 1964 నుంచి ప్రారంభమైంది. ఇప్పటివరకూ ముద్రించిన వాటిలో రికార్డు స్థాయిలో 12 వేల అమ్మకాలు జరిగాయి. తాజాగా ఎన్టీఆర్ స్మారక నాణెం ఆ రికార్డును అధిగమించింది.’ . ఎన్టీఆర్ పేరుతో ఏ కార్యక్రమం మొదలుపెట్టినా విజయం తథ్యమనే నమ్మకం ఉంది. ఎన్టీఆర్ స్మారక నాణెం అత్యధిక విక్రయాలతో ప్రథమంగా నిలవడంతో ఆ సెంటిమెంట్ నిజమైంది.
నందమూరి తారకరామారావు శతజయంతి ఉత్సవాల సందర్భంగా కేంద్ర ప్రభుత్వం ప్రత్యేక రూ.100 నాణెం విడుదల చేసింది. ఆగస్ట్ 28న ఢిల్లీలో రాష్ట్రపతి ద్రౌపది ముర్ము ఈ నాణేన్ని నందమూరి కుటుంబ సభ్యుల సమక్షంలో ఆవిష్కరించారు. 29 నుంచి ప్రజలకు అందుబాటులోకి తెచ్చారు. ఈ నాణేనికి ఓ వైపు మూడు సింహాలతో పాటు అశోక చక్రం ఉండగా మరోవైపు ఎన్టీఆర్ చిత్రం, ఆ చిత్రం కింద నందమూరి తారక రామారావు శతజయంతి అని హిందీ భాషలో ముద్రించారు.
