ఏపీ మంత్రి రోజా ఇటీవల తన కుటుంబాన్ని సోషల్ మీడియాలో ట్రోల్ చేస్తున్నారని ఏడ్చారు. కానీ ఇప్పుడు ఆమె మెగా కుటుంబం అంటూ చిరంజీవి కుటుంబం మొత్తాన్ని దారుణంగా కించ పరుస్తూ మాట్లాడుతున్నారు. మెగా కుటుంబం అంటే అసలు ఎవరికీ సాయం చేయని కుటుంబమని.. అందుకే ముగ్గురూ సొంత జిల్లాలో ఓడిపోయారని ఆమె విమర్శించారు. రోజా వ్యాఖ్యలు ఇప్పుడు మెగా అభిమానుల్లో కలకలం రేపుతున్నాయి. రాజకీయంగా వివాదాలుంటే పవన్ కల్యాణ్ ను విమర్శించవచ్చు కానీ.. చిరంజీవి ఎందుకు ఈ అంశంలో లాగుతున్నారన్న విమర్శలు వినిపిస్తున్నాయి.
రోజా మాటలు మామూలుగానే దారుణంగా ఉంటాయి. ఓ మహిళ మాట్లాడే మాటలు కానట్లుగా ఉంటాయి. ఆమె మాట తీరుపై ఎంత దారుణమైన విమర్శలు వస్తున్నా వెనక్కి తగ్గరు. కొనసాగిస్తూనే ఉంటారు. వ్యక్తుల్ని విమర్శించడం.. తిట్లు అందుకోవడంతో పాటు ఇప్పుడు నేరుగా కుటుంబాలను టార్గెట్ చేయడం కలకలం రేపుతోంది. నిజానికి చిరంజీవి ఇప్పుడు రాజకీయాలకు దూరంగా ఉన్నారు. ఆయన ఎవర్నీ నొప్పించేలా ప్రకటనలు చేయడం లేదు. వైసీపీ నేతలు గౌరవిస్తే తానూ గౌరవిస్తున్నారు. ఇటీవల రోజా కూడా మంత్రి పదవి వచ్చిన తర్వాత చిరంజీవి దగ్గరకు వెళ్లి ఆశీస్సులు తీసుకున్నారు.
ఇలాంటి అంశాలను మర్చిపోయి ఇప్పుడు రోజా చిరంజీవిపై కూడా అనుచిత వ్యాఖ్యలు చేయడం దుమారం రేగుతోంది. పవన్ కల్యాణ్ .. కోట్ల రూపాయల్ని ఆత్మహత్య చేసుకున్న రైతుల కుటుంబాలకు ఇస్తున్నారు. ప్రభుత్వం కూడా చేయలేని పనిని చేస్తున్నారు. చిరంజీవి బ్లడ్ బ్యాంక్ ద్వారా మాత్రమే కాదు ఇటీవల కరోనా కాలంలో ఎంతో మందిని ఆయన ఆదుకున్నారు. ఇన్ని చేస్తున్నా.. రాజకీయాల్లో ఓటముల్ని చూపించి రోజా కించపర్చడం.. మెగా అభిమానుల్ని అసహనానికి గురి చేస్తోంది.
