ఆంధ్రజ్యోతి మేనేజింగ్ డైరక్ట్ వేమూరి రాధాకృష్ణ.. తన వారాంతపు ఆర్టికల్ “కొత్తపలుకు”లో సింహభాగం మాజీ స్పీకర్ కోడెల శివప్రసాదరావు ఆత్మహత్య పూర్వాపరాలపై దృష్టి కేంద్రీకరించారు. ఈ అంశంలో… మొదటి నుండి ప్రచారం జరుగుతున్నట్లుగా… ప్రభుత్వ వేధింపుల వల్లే…కోడెల ఆత్మహత్య అని ఆర్కే తేల్చారు. ” రాజకీయాల్లో హత్యలు చేయడం చూశాం కానీ, ఆత్మహత్య చేసుకునే పరిస్థితి దాపురించడాన్ని ఇప్పుడే చూస్తున్నాం…” అని ఆర్కే ఆవేదన చెందారు.
కోడెల ఆత్మహత్యకు ప్రభుత్వ వేధింపులే కారణం..!
“కొత్తపలుకు”లో కోడెలను… గత మూడు నెలలుగా ఎలా వేధించారో.. ఆర్కే వివరంగా రాసుకొచ్చారు. కోడెల శివప్రసాదరావు, ఆయన కుమారుడు, కుమార్తెపై పలు కేసులను నమోదు చేసిన ప్రభుత్వం ఫర్నీచర్ విషయాన్ని దొంగతనంగా మార్చడంతోనే ఆయన మానసికంగా వేదనకు గురయ్యారని ఆర్కే చెబుతున్నారు. అయితే.. ఇందులో కోడెల కుమారుడి తీరును.. ఆర్కే కూడా తప్పు పట్టారు. ఓ చిన్న కేసుకే.. కోడెల ఆత్మహత్య చేసుకుని ఉంటారా.. అని వస్తున్న సందేహాలకు కూడా.. ఆర్కే సమాధానం ఇచ్చారు. ఫర్నీచర్ కోసం కక్కుర్తి పడ్డారా.. అని తాను కూడా సందేహించేలా పరిస్థితులు వచ్చాయన్నారు. నైతిక మద్దతు ఇవ్వడానికి టీడీపీ నేతలు కూడా సిద్ధపడని విషయాన్ని గుర్తు చేశారు.
రేపు వైసీపీ అధికారం కోల్పోతే పరిస్థితి ఏమిటి..?
అధికారం శాశ్వతమని.. అధికారంలో ఉన్న వారికి అనిపించవచ్చేమో కానీ.. కాస్త తెలివి ఉన్న వారెవరికైనా.. అది అశాశ్వతతమని తెలుసు. రేపు కచ్చితంగా అధికారం పోతుంది. అప్పుడు.. ఇప్పుడు.. వేధింపులకు పాల్పడుతున్న నేతలు.. ఆ పార్టీలో ఉన్న వారి పరిస్థితేమిటన్నది … ఆర్కే..”కొత్తపలుకు”లో లేవనెత్తిన చర్చ. ఇప్పుడు దెబ్బలు తింటున్న నేతలు.. అప్పుడు.. సైలెంట్ గా ఎలా ఉంటారు..? ” తదుపరి ఎన్నికలలో ఓడిపోతే తమ గతి ఏమిటి? అని ఒక్క క్షణం ఆలోచించినా ఈ దుస్ధితి పోతుంది..” అని ఆర్కే చెప్పుకొచ్చారు.
వేధించడానికేనా ఈ ప్రభుత్వం..!
ఆర్కే… “కొత్తపలుకు”లో చాలా కీలకమైన అంశాలను లేవనెత్తారు. ఈ ప్రభుత్వం వేధించడానికి తప్ప.. ఇక ఏ పనీ చేయడం లేదని… తేల్చేశారు. చంద్రబాబు ఉంటున్న ఇంటికి మరోసారి నోటీసులు జారీ చేయడాన్ని ఆర్కే ప్రస్తావించారు. ” కోడెల శివప్రసాదరావు మరణం మిగిల్చిన ప్రశ్నలు, గుణపాఠాలు కూడా ఉన్నాయి. అధికారంలో ఉన్నప్పుడు విర్రవీగడం తగదని రాజకీయాల్లో ఉన్నవారు తెలుసుకోవాలని..” నేరుగా.. ఓ రకంగా.. హెచ్చరికల్లాంటివి పంపేశారు.
