ఎం.ఎల్‌.ఏ రోజా.. ఇప్పుడు మంత్రి రోజా అయ్యారు. బాధ్య‌త‌లు పెరిగాయి. అందుకే… `జ‌బ‌ర్‌ద‌స్త్‌`తో సహా, ఇత‌ర టీవీ కార్య‌క్ర‌మాల‌కు, షూటింగుల‌కు ఆమె గుడ్ బై చెప్పేశారు. ఎం.ఎల్‌.ఏ అయినా కూడా జ‌బ‌ర్ద‌స్త్ లాంటి షోల‌లో ఆమె పాల్గొన‌డం వివాదాల‌కు కార‌ణ‌మైంది. `ప్ర‌జ‌లు నిన్ను ఎన్నుకున్న‌ది కామెడీ షోల కోసం కాదు.` అని ఎద్దేవా చేశారు. మంత్రి అయ్యాక కూడా… ఆమె ఇలానే ప్ర‌వ‌ర్తిస్తే, అది పార్టీకే న‌ష్టం. అందుకే రోజా ఈ నిర్ణ‌యం తీసుకొన్నారు. “ఇక జ‌బ‌ర్ద‌స్త్ తో పాటు ఇత‌ర షూటింగుల‌కూ నేను వెళ్ల‌లేను. ఎం.ఎల్‌.ఏ గా ఉన్న‌ప్పుడు నా నియోజ‌క వ‌ర్గాన్ని చూసుకుంటూనే షూటింగుల‌కు వెళ్లేదాన్ని. కేవ‌లం నా కుటుంబాన్ని పోషించుకోవ‌డానినీ, నా అభిమానుల్ని సంతృప్తి ప‌ర‌చ‌డానికీ.. ఇలాంటి షోల‌లో పాల్గొనేదాన్ని. ఇప్పుడు నా బాధ్య‌త‌లు పెరిగాయి. అందుకే… షూటింగుల‌కు గుడ్ బై చెప్పేస్తున్నా. అయితే ఈ విష‌యంలో జ‌గ‌న్ న‌న్ను ఎప్పుడూ ప్ర‌శ్నించ‌లేదు. షూటింగుల‌కు ఎందుకు వెళ్తున్నావు… అని అడ‌గ‌లేదు. ఇప్పుడు కూడా నా అభీష్టం ప్ర‌కార‌మే ఈ నిర్ణ‌యం తీసుకొన్నా“ అని చెప్పుకొచ్చారామె. జ‌బ‌ర్‌ద‌స్త్ నుంచి నాగ‌బాబు ఎప్పుడో వెళ్లిపోయారు. ఆయ‌న స్థానంలో మ‌నో వచ్చారు. మ‌రి రోజా స్థానం ఎవ‌రితో భ‌ర్తీ చేస్తారో?