రాజ‌మౌళి ఏం చేసినా.. అందులో ఓ మ్యాజిక్ ఉంటుంది. ఆఖ‌రికి పోస్ట‌ర్ డిజైనింగ్ లో కూడా. `రోర్ ఆఫ్ ఆర్‌.ఆర్‌.ఆర్‌` పేరుతో విడుద‌ల చేసిన మేకింగ్ వీడియోలోనూ… అదే క‌నిపించింది. రాజ‌మౌళి ద‌ర్శ‌కుడిగా ఎన్టీఆర్ – చ‌ర‌ణ్‌ల‌తో రూపొందించిన మ‌ల్టీస్టారర్ `ఆర్‌.ఆర్‌.ఆర్‌`. అక్టోబ‌రు 13న రాబోతోంది. ఈ రోజు మేకింగ్ వీడియో ఒక‌టి విడుద‌ల చేశారు.

మేకింగ్ వీడియో అంటే.. సెట్లో జ‌రిగిన విశేషాల స‌మాహారం. అలాంటి వీడియోలేం కొత్త కాదు. కానీ.. రోర్ ఆఫ్‌ ఆర్‌.ఆర్‌.ఆర్ చూస్తుంటే, సినిమా చూస్తున్న థ్రిల్, అనుభూతి క‌లిగింది. సెట్లో ఎవ‌రెంత క‌ష్ట‌ప‌డ్డారో, దాని వెనుక ఉన్న క‌ష్టాలేంటో… ఈ 100 సెక‌న్ల వీడియోలో చూపించేశారు. ఆ బ్లాస్టింగులు, సెట్లు, తుపాకుల మోత‌.. ముఖ్యంగా ఎన్టీఆర్‌, చ‌ర‌ణ్‌ల ఎంట్రీ.. వీట‌న్నింటికంటే మించి కీర‌వాణి ఇచ్చిన‌ బ్యాక్ గ్రౌండ్ స్కోర్‌…. ఇవ‌న్నీ క‌చ్చితంగా గూజ్ బ‌మ్స్ తెప్పించే మూమెంట్సే. ఆర్‌.ఆర్‌.ఆర్‌తో మ‌రోసారి రాజ‌మౌళి దేశ వ్యాప్తంగా ఉన్న సినీ అభిమానుల దృష్టి త‌న వైపుకు తిప్పుకుంటాడ‌న్న న‌మ్మ‌కం ఈ మేకింగ్ వీడియోతో మ‌రింత‌గా బ‌ల‌ప‌డింది.