`ఆర్.ఆర్.ఆర్` గురించి చాలా సందేహాలున్నాయి. ఈ సినిమాలో హీరోయిన్లు ఎవ‌ర‌న్న‌ది ఇంకా తేల‌లేదు. హీరోల పాత్ర‌ల గురించి కూడా ర‌క‌ర‌కాల ఊహాగానాలు వినిపిస్తున్నాయి. వీట‌న్నింటికీ రేపు (గురువారం) పుల్ స్టాప్ ప‌డ‌బోతోంది. `ఆర్.ఆర్.ఆర్`కి సంబంధించిన తొలి ప్రెస్ మీట్ గురువారం జ‌ర‌గ‌బోతోంది. రాజ‌మౌళి, ఎన్టీఆర్‌, రామ్ చ‌ర‌ణ్ ఈ ప్రెస్ మీట్లో పాల్గొంటారు. మీడియా అడిగే ప్ర‌శ్న‌ల‌కు స‌మాధానాలు చెబుతారు.
మ‌ర్యాద రామ‌న్న, ఈగ సినిమాల‌కు సంబంధించి రాజ‌మౌళి ముందే క‌థ చెప్పేశాడు. మ‌గ‌ధీర స‌మ‌యంలోనూ అదో పున‌ర్జ‌న్మ‌ల ప్రేమ‌క‌థ అని ముందే హింట్ ఇచ్చేశాడు. ఈసారి కూడా రాజ‌మౌళి ముందే క‌థ ఏంటో చెప్పేస్తే ఛాన్సుంది. ఎందుకంటే `ఈ క‌థ ఇదీ..` అంటూ ర‌క‌ర‌కాల ఊహాగానాలు బ‌య‌ట‌కు వ‌స్తున్నాయి. వాటికి రాజ‌మౌళి పుల్ స్టాప్ పెట్టాల‌ని భావిస్తున్నాడు. లైన్‌గా ఈ క‌థ చెప్పి, ప్రేక్ష‌కుల్ని, విమ‌ర్శ‌కుల్ని ముందే ప్రిపేర్ చేసేయాల‌ని చూస్తున్నాడు. కథానాయిక‌ల విష‌యంలోనూ ఓ స్ప‌ష్ట‌త వ‌చ్చేసిన‌ట్టు స‌మాచారం. ముగ్గురు క‌థానాయిక‌ల్లో క‌నీసం ఇద్ద‌రి పేర్ల‌ని రేపు అధికారికంగా ప్ర‌క‌టించే వీలుంది.
