బుల్లి తెర న‌టి శ్రావ‌ణి ఆత్మ‌హ‌త్య కేసులో ఆరోప‌ణ‌లు ఎదుర్కొంటున్న వాళ్ల‌లో `ఆర్‌.ఎక్స్ 100` నిర్మాత అశోక్ రెడ్డి ఒక‌రు. ఈకేసు పూర్వాప‌రాల‌ను ప‌రిశీలించిన పోలీసులు, లోతుగా ద‌ర్యాప్తు చేసి అశోక్ రెడ్డిని ఏ 2గా గుర్తించారు. సోమ‌వారం పోలీసులు ముందు హాజ‌రు కావ‌ల్సిన అశోక్ రెడ్డి… ఫోన్ స్విచ్చాఫ్ చేసి అజ్ఞాతంలోకి వెళ్లిపోయారు. ఎట్ట‌కేల‌కు పోలీసులు అశోక్‌రెడ్డిని అదుపులో తీసుకున్నారు. ప్ర‌స్తుతం వైద్య ప‌రీక్ష‌లు నిర్వ‌హిస్తున్నారు. ఈసాయింత్రంలోగా కోర్టులో హాజ‌రు ప‌రిచి, రిమాండుకి త‌ర‌లించే అవ‌కాశం ఉంది.

సాయిరెడ్డి, దేవ‌రాజ్ రెడ్డి, అశోక్ రెడ్డి వేధింపుల వ‌ల్లే… శ్రావ‌ణి ఆత్మహ‌త్య చేసుకుంద‌ని పోలీసులు త‌మ ద‌ర్యాప్తులో తేల్చారు. సినిమా అవ‌కాశాలు ఇప్పిస్తానంటూ అశోక్ రెడ్డి శ్రావ‌ణికి ద‌గ్గ‌ర‌య్యాడ‌ని, అయితే అప్ప‌టికే శ్రావ‌ణి.. దేవరాజ్‌ని ప్రేమిచింద‌ని, దేవ‌రాజ్‌ని అడ్డుతొల‌గించుకోవాల‌ని సాయి, అశోక్ రెడ్డి ప‌థ‌కం ప‌న్నార‌ని, అయితే ఎంత చెప్పినా శ్రావ‌ణి దేవ‌రాజ్‌కి దూరం కాక‌పోయేస‌రికి.. శ్రావ‌ణికి అశోక్ రెడ్డి, సాయిరెడ్డి క‌లిసి మాన‌సికంగా వేధించార‌ని పోలీసులు చెబుతున్నారు. ఇందుకు సంబంధించిక కాల్ రికార్డులు, ఇత‌ర ఆధారాలు పోలీసులు సేక‌రించారు.