ఆంధ్రప్రదేశ్‌ అసెంబ్లీ ఎన్నికలు మళ్లీ 2024లోనే జరగాల్సి ఉంది. కానీ రెండు, మూడేళ్ల ముందే వస్తాయని… వైఎస్ జగన్మోహన్ రెడ్డికి చెందిన పత్రిక సాక్షి ఊహిస్తోంది. ఈ మేరకు.. ఢిల్లీలో జరుగుతున్న పరిణామాలను విశ్లేషించి.. ఏపీలో మారుతున్న రాజకీయాలకు.. వాటిని కలిపి.. కాస్త ఆసక్తికరమైన కథనాలను.. ఎడిటోరియల్ పేజీలోనే ప్రచురిస్తున్నారు. ప్రముఖ జర్నలిస్ట్ ఏబీకే ప్రసాద్ సాక్షిలో ” రెండో మాట” పేరుతో ఆర్టికల్ రాస్తున్నారు. ఆ ఆర్టికల్‌లో.. 2022లోనే ఏపీలో మళ్లీ అసెంబ్లీ ఎన్నికలు వస్తాయన్న అంశాన్ని హైలెట్ చేశారు.
ముందస్తు సమాచారం వల్లే సాక్షి యాజమాన్యం ఇవి రాయిస్తోందా..?
సాధారణంగా.. సాక్షి దినపత్రికలో.. ఎలాంటి రాజకీయ వార్తలైనా… వైసీపీ రాజకీయ సిద్దాందాలకు… అనుగుణంగా ఉంటేనే ప్రచురిస్తారు. ఎంత పెద్ద జర్నలిస్టుకు అయినా.. అలా రాసేవారు అయితే మాత్రమే… సాక్షి పత్రిక.. ప్రొత్సహిస్తుంది. లేకపోతే లేదు. అనేక మంది సుప్రసిద్ధ కాలమిస్టులకు.. వైసీపీ పెద్దల నుంచి … ఫలానా అంశంపై.. ” కాలమ్ ” కావాలని అడుగుతారని.. ఆ ప్రకారం వారు రాసి పంపుతారని అంటున్నారు. ఈ కోణంలోనే… ఢిల్లీలో విస్తృతంగా జరుగుతున్న ముందస్తు జమిలీ ఎన్నికలు… ఏపీలో.. టీడీపీ నేతలు వరుసగా బీజేపీలో చేరడం.. వంటి పరిణామాలను లింక్ కలిపి… రాజకీయ విశ్లేషణ చేసినట్లుగా తెలుస్తోంది. కచ్చితంగా.. ముందస్తు జమిలీ పేరుతో ఏపీలోనూ… రెండు, మూడేళ్ల ముందు ఎన్నికలు పెడతారనే సందేహం.. వైసీపీలోనే అంతకంతకూ పెరగడానికి ఇలాంటి ఆర్టికల్స్ సాక్ష్యమనే భావన వ్యక్తమవుతోంది.
చంద్రబాబు కోటరీనే బీజేపీలో చేరడమే వైసీపీ అనుమానాలకు కారణమా..?
భారతీయ జనతాపార్టీ ఆంధ్రప్రదేశ్‌లో ఫుల్ స్వింగ్లో ఉంది. టీడీపీ నేతల్ని వరుసగా చేర్చుకుంటూ.. అధికారం మాదేననే ప్రకటనలు చేస్తున్నారు. ఇదే వైసీపీని ఆందోళనకు గురి చేస్తున్నట్లుగా కనిపిస్తోంది. చంద్రబాబుకు అత్యంత సన్నిహితంగా ఉండే నేతలే బీజేపీలో చేరడంతో.. వైసీపీ అనుమానాలకు మరింత బలం చేకూరుస్తోంది. 2022లోనే అసెంబ్లీ ఎన్నికలు నిర్వహిస్తారని.. అప్పుడు.. బీజేపీ – టీడీపీ పొత్తు పెట్టుకుంటాయని.. దానికి ఇప్పుడు బీజేపీలో చేరిన నేతలే కీలకపాత్ర పోషిస్తారన్న అనుమానాలను సాక్షి వ్యక్తం చేస్తోంది.
నిజంగానే జమిలీపై బీజేపీ చాలా సీరియస్…!
జమిలీ ఎన్నికలు నిర్వహించడానికి సిద్ధమైన సమయంలో… దేశంలోని ప్రతీ రాష్ట్రంలోనూ… తమ పార్టీ ప్రభుత్వం లేదా.. మిత్రపక్షం ఉండేలా చూసుకోవాలని.. బీజేపీ పెద్దలు లక్ష్యంగా పెట్టుకున్నారు. అసాధ్యంగా అనిపిస్తున్న.. ఏపీ, తెలంగాణలపైనే వారు ప్రధానంగా దృష్టి పెట్టారు. అందులో భాగంగానే.. ఏపీ, తెలంగాణల్లో.. చేరికల హడావుడి చేస్తున్నారని చెబుతున్నారు. ఇటు చేరికలను పూర్తి చేసి.. పార్టీని బలోపేతం చేయడానికి… అటు జమిలీపై.. రాజ్యాంగ సవరణలు… ఇతర కసరత్తు చేయడానికి కనీసం మూడేళ్లు పడుతుందని.. బీజేపీ అగ్రనేతలు లక్ష్యంగా పెట్టుకున్నట్లుగా చెబుతున్నారు. ఈ మూడేళ్లలో.. కసరత్తు పూర్తి చేసి.. మిగతా లాంఛనాలు కూడా.. అయితే.. రెండేళ్ల ముందే.. దేశవ్యాప్తంగా జమిలీ ఎన్నికలు నిర్వహించే అవకాశం ఉందని చెబుతున్నారు. అంటే 2022లో జమిలీ ఎన్నికలు పెట్టొచ్చు. ఏ ఏడాది దాదాపుగా ఎనిమిది రాష్ట్రాలకు.. అసెంబ్లీ ఎన్నికలు జరగాల్సి ఉంది. ఆ తర్వాత ఏడాది మరో ఐదు రాష్ట్రాలకు జరగాల్సి ఉంది. 2022లో నాలుగు రాష్ట్రాలకు అసెంబ్లీ ఎన్నికలు జరగాల్సి ఉంది. వీటన్నింటినీ కలిపేసి.. 2022లో పెట్టడానికి.. బీజేపీ అంతర్గత కసరత్తు చేస్తోందని తాజా పరిణామాలతో స్పష్టమవుతోంది. ఇదే వైసీపీని ఆందోళనకు గురి చేస్తున్నట్లుగా కనిపిస్తోంది.
