మెగా హీరోల్లో సాయి ధరం తేజ్ చూపిస్తున్న దూకుడు మిగతా ఏ హీరో చూపించట్లేదు అంటే నిజమేనే అనాలనిపిస్తుంది. మొన్ననే సుబ్రమణ్యం ఫర్ సేల్ అంటూ ప్రేక్షకుల హృదయాల్లో బాగా సేల్ అయిన ఈ మెగా మేనళ్లుడు ఇప్పుడు సుప్రీం అంటూ వచ్చేందుకు సిద్ధమయ్యాడు. పటాస్ తో సూపర్ హిట్ అందుకున్న దర్శకుడు అనీల్ రావిపూడి దర్శకత్వంలో దిల్ రాజు నిర్మాణ సారధ్యంలో వస్తున్న సినిమా సుప్రీం.
శరవేగంగా షూటింగ్ జరుపుకుంటున్న ఈ సినిమా దాదాపు పూర్తి కావొచ్చింది. అన్ని హంగులను ముగించుకుని ఈ సినిమా ఏప్రిల్ 1న రిలీజ్ చేసేందుకు సన్నాహాలు చేస్తున్నారు దర్శక నిర్మాతలు. సాయి సరసన రాశి ఖన్నా నటిస్తున్న ఈ సినిమాలో ఇషా చావ్లా ఓ హాట్ ఐటం సాంగ్ చేస్తుంది. సంక్రాంతి బరిలో పోటీ పడ్డట్టుగా ఈసారి సమ్మర్ రాకముందే పెద్ద సినిమాలన్ని పోటీ పడుతుండటంతో చిన్న సినిమాలను ముందే రిలీజ్ చేసేలా ప్లాన్ చేసుకుంటున్నారు.
ఆ క్రమంలోనే సాయి ధరం తేజ్ నటిస్తున్న సుప్రీం సినిమాను ఏప్రిల్ 1న ప్రేక్షకుల ముందుకు తెచ్చేందుకు రెడీ అవుతుంది. మార్చ్ 25న నాగార్జున, కార్తి కలిసి నటించిన ఊపిరి వస్తుండగా.. ఏప్రిల్ 8న పవర్ స్టార్ పవన్ కళ్యాన్ సర్దార్ గబ్బర్ సింగ్ రానే వస్తున్నాడు. మరి ఓ వారం ముందు భారీ మల్టీస్టారర్.. వారం తర్వాత ట్రెండ్ సెట్ సినిమాలుండగా.. మధ్యలో తన సినిమాను రిలీజ్ చేస్తూ తన ఘట్స్ ఏంటో చూపించాలనుకుంటున్నాడు మెగా కుర్రాడు. అయినా సినిమా మీద నమ్మకం ఉండబట్టే దిల్ రాజు ఈ రిలీజ్ కు సై అన్నాడు. భారీ సినిమాల మధ్యలో రిలీజ్ అవుతున్న సాయి సుప్రీం సినిమా ఎలాంటి ఫలితాన్ని ఇస్తుందో చూడాలి.
