విరూపాక్ష‌తో ఓ సూప‌ర్ హిట్ కొట్టాడు సాయిధ‌ర‌మ్ తేజ్‌. హార‌ర్‌ని, స‌స్పెన్స్‌తో మిక్స్ చేసిన ఓ ఫాంట‌సీ క‌థ అది. విరూపాక్ష‌తో హీరోగా త‌న కెరీర్‌లో ఓ వెరైటీ జోన‌ర్‌ని ట‌చ్ చేసిన‌ట్టైంది. ఇప్పుడు తేజ్ మ‌రో సినిమాని మొద‌లెట్టాడు. రోహిత్ ఈ సినిమాతో ద‌ర్శ‌కుడిగా ప‌రిచ‌యం కానున్నాడు. ఈరోజు నుంచే షూటింగ్ కూడా మొద‌లైంది. కాన్సెప్ట్ పోస్ట‌ర్ చూస్తే, ఈసారి కూడా కొత్త త‌ర‌హా కథ‌ని ఎంచుకొన్న‌ట్టు స్ప‌ష్టం అవుతోంది. లాండ్ మైన్స్‌తో నిండిన ఎడారిలో ఓ ప‌చ్చ‌ని చెట్టుని పోస్ట‌ర్‌గా విడుద‌ల చేశారు. ఆ పోస్ట‌ర్ ని బట్టి కాన్సెప్ట్ ని కొద్ది కొద్దిగా అర్థం చేసుకొనే అవ‌కాశం ఉంది. పాన్ ఇండియా స్థాయిలో ఈ చిత్రాన్ని రూపొందిస్తున్నారు. ప్రైమ్ షో ఎంట‌ర్‌టైన్‌మెంట్స్ ప‌తాకంపై ఈ చిత్రాన్ని నిరంజ‌న్‌రెడ్డి రూపొందిస్తున్నారు. కథానాయిక‌, ఇత‌ర సాంకేతిక నిపుణుల వివ‌రాలు త్వ‌ర‌లో తెలియజేస్తారు.

నిజానికి ఈ సినిమా ప్లేస్‌లో ‘గంజా శంక‌ర్‌’ మొద‌ల‌వ్వాల్సింది. కానీ.. బ‌డ్జెట్ ప‌రిమితుల వ‌ల్ల ఆ సినిమా ఆగిపోయింది. సితార ఎంట‌ర్‌టైన‌మ్మెంట్స్‌లో చేయాల్సిన సినిమా అది. ఇప్పుడు సితార తేజ్ కోసం మ‌రో క‌థ‌ని సిద్ధం చేస్తున్న‌ట్టు స‌మాచారం. దానికి సంబంధించిన వివ‌రాలు కూడా త్వ‌ర‌లో వెల్ల‌డ‌వుతాయి.