ఈమ‌ధ్య పెద్ద సినిమా ఏదైనా స‌రే.. డైలాగ్ రైట‌ర్ గా బుర్రా సాయిమాధ‌వ్ పేరే వినిపిస్తోంది. ఎలాంటి క‌థ‌కైనా.. చురుకైన‌, సొగ‌సైన‌, లోతైన మాట‌ల్ని రాయ‌డంలో ఆయ‌న పండిపోయారు. అందుకే… పెద్ద సినిమాల‌న్నీ ఆయ‌న పంచ‌న చేరుతున్నాయి. తాజాగా ఆయ‌న చేతిలో మ‌రో క్రేజీ ప్రాజెక్టు చేరింది. రామ్ చ‌ర‌ణ్ – శంక‌ర్ కాంబినేష‌న్ లో ఓ సినిమా రూపుదిద్దుకుంటున్న సంగ‌తి తెలిసిందే. దిల్ రాజు నిర్మాత‌. ఈ చిత్రానికి డైలాగ్ రైట‌ర్ గా బుర్రా సాయిమాధ‌వ్ ఫిక్స్ అయ్యారు. అంతే కాదు.. రామ్ – లింగు స్వామి సినిమాకీ బుర్రానే డైలాగ్ రైట‌ర్‌. బాల‌కృష్ణ – గోపీచంద్ మ‌లినేని కాంబోలో ఓ చిత్రం రూపుదిద్దుకుంటోంది. దీనికీ ఆయ‌నే ర‌చ‌యిత‌. ప్ర‌భాస్ – నాగ అశ్విన్ సినిమా కూడా సాయిమాధ‌వ్ చేతిలో ఉన్న సంగ‌తి తెలిసిందే. ఇలా… భారీ ప్రాజెక్టుల‌న్నీ బుర్రాని వెదుక్కుంటూ వెళ్తున్నాయి. ప్ర‌స్తుతం `వీర‌మ‌ల్లు` చిత్రానికి బుర్రా సంభాష‌ణ‌లు స‌మ‌కూరుస్తున్నారు.