టాలీవుడ్ లో ఓ కొత్త కాంబోకి తెర లేవ‌నుందా? విజ‌య్ దేవ‌ర‌కొండ‌, సాయి ప‌ల్ల‌వి క‌లిసి న‌టించ‌బోతున్నారా? ఆ అవ‌కాశాలు ఉన్నట్టే క‌నిపిస్తోంది. విజ‌య్ దేవ‌ర‌కొండ క‌థానాయ‌కుడిగా దిల్ రాజు బ్యాన‌ర్‌లో ఓ సినిమా రూపుదిద్దుకొంటోంది. ‘రాజావారు రాణీగారు’ తో ఆక‌ట్టుకొన్న ర‌వికిర‌ణ్ కోలా ద‌ర్శ‌కుడు. విజ‌య్ పుట్టిన రోజు సంద‌ర్భంగా ఈ చిత్రానికి సంబంధించిన అధికారిక ప్ర‌క‌ట‌న వ‌చ్చింది. రూర‌ల్ యాక్ష‌న్ డ్రామాగా ఈ చిత్రాన్ని తెర‌కెక్కిస్తున్నారు. ‘రౌడీ జ‌నార్థ‌న్‌’ అనే పేరు ప‌రిశీల‌న‌లో ఉంది. ఈ చిత్రంలో సాయిప‌ల్ల‌విని క‌థానాయిక‌గా ఎంచుకొనే అవ‌కాశాలు క‌నిపిస్తున్నాయి. ద‌ర్శ‌కుడు సాయిప‌ల్ల‌విని దృష్టిలో ఉంచుకొనే హీరోయిన్ పాత్ర‌ని డిజైన్ చేశాడ‌ట‌. క‌థానాయిక పాత్ర‌కు చాలా ప్రాధాన్యం ఉంటుంద‌ని, ఆ పాత్ర‌లో సాయి ప‌ల్ల‌వి అయితేనే న్యాయం చేస్తుంద‌ని ద‌ర్శ‌కుడు భావిస్తున్నట్టు తెలుస్తోంది. ‘ఫిదా’, ‘ఎంసీఏ’ త‌ర‌వాత దిల్ రాజు బ్యాన‌ర్‌లో సాయి ప‌ల్ల‌వి మ‌రో సినిమా చేయ‌లేదు. అందుకే సాయి ప‌ల్ల‌వి డేట్ల కోసం దిల్ రాజు కూడా గ‌ట్టిగా ప్ర‌య‌త్నిస్తున్న‌ట్టు తెలుస్తోంది. క‌థ న‌చ్చితే, త‌న పాత్ర బాగుంటే ఇత‌ర విష‌యాల గురించి ప‌ట్టించుకోదు సాయి ప‌ల్ల‌వి. త‌నకు ఓకే అంటే.. విజ‌య్ – సాయి ప‌ల్ల‌వి లాంటి క్రేజీ కాంబోని తెర‌పై చూసే అవ‌కాశం ద‌క్కుతుంది. విజ‌య్ ప్ర‌స్తుతం గౌత‌మ్ తిన్న‌నూరితో ఓ సినిమా చేస్తున్నాడు. ఆ త‌ర‌వాత రాహుల్ సంకృత్య‌న్ సినిమా ప‌ట్టాలెక్కుతుంది. ఇవి రెండూ ముగిసిన త‌ర‌వాతే… ర‌వికిర‌ణ్ కోలా సినిమా మొద‌ల‌వుతుంది.