గత ఎన్నికలకు ముందు వైఎస్ వివేకా హత్య జరిగినప్పుడు .. ప్రతిపక్షంలో ఉన్న వైసీపీ నేతలు చాలా ప్రచారాలు చేశారు. అయితే వారెన్ని ఆరోపణలు చేసినా అది రాజకీయమే. కానీ సాక్షి మీడియా మాత్రం మరింత ముందుకెళ్లింది. నారాసుర రక్త చరిత్ర పేరుతో నాలుగు పేజీల కథనాలను రాసింది. అందులో వైఎస్ కుటుంబంలోని ఫ్యాక్షన్ హత్యలన్నీ.. చంద్రబాబే చేయించారని ఆరోపించింది. అంతే కాదు.. చంద్రబాబు చేతిలో వేట కత్తి పెట్టి.. దానికి రక్తపు మరకలు కూడా గ్రాఫిక్స్‌గా స్పెషల్ ఎఫెక్ట్స్ వేసి… ఫోటోలో చూపించారు. అప్పట్లో ఈ కథనాలు సంచలనం సృష్టించాయి. సాక్షికి ఉన్న మీడియా ప్రివిలేజెస్ ని గౌరవించే టీడీపీ.. ఆ కథనాలను ప్రజాస్వామ్యబద్దంగానే ఖండించారు.
కానీ ఇప్పుడు ఆ వ్యవహారాన్ని ప్రజల్లోకి మరింతగా తీసుకెళ్లాలని నిర్ణయించింది. జగన్ అధికారంలోకి వచ్చి రెండేళ్లయినా బాబాయ్ హత్య కేసును తేల్చకపోవడం.. సీబీఐ విచారణ వద్దని వెనక్కి తగ్గడం… సొంత కుటుంబసభ్యులపైనే.. వివేకా కుమార్తె.. ఆరోపణలు చేయడం వంటి వాటితో.. కేసు సంగతి తేల్చాలని డిమాండ్ చేస్తోంది. దీన్ని మరింతగా ప్రజల్లోకి తీసుకెళ్లేందుకు నారా లోకేష్.. శ్రీవారి ఆలయంలో ప్రతిజ్ఞ చేయాలని జగన్‌కు సవాల్ చేశారు. నారాసురరక్త చరిత్ర అంటూ .. తన తండ్రిపై నిందలు వేశారని.. అవన్నీ నిజం అని ప్రమాణం చేయాలని… సవాల్ చేశారు. పధ్నాలుగో తేదీన ముహుర్తం పెట్టారు. అదే రోజున జగన్ సభ ఉండటంతో వస్తారని అనుకున్నారు. కానీ జగన్ సభ క్యాన్సిల్అయింది. అయినా లోకేష్ తాను సవాల్ చేసినట్లుగా అలిపిరి చేరుకున్నారు. అక్కడ నారాసుర రక్త చరిత్ర కథనాలను చూపించి… మరోసారి ఘాటు విమర్శలు చేశారు.
వివేకానంద హత్య కేసు ఇప్పుడు రాష్ట్ర వ్యాప్తంగా సంచలనం అయింది. నిందితులెవరో ఇంత వరకూ కనిపెట్టలేదు. కానీ ఆ హత్య ఎవరు చేశారో… ఆ నోటా.. ఈ నోటా అందరికీ తెలిసిపోయింది. కానీ అధికారికంగా దర్యాప్తు సంస్థలే నిరూపించాల్సి ఉంది. కానీ దర్యాప్తు సంస్థలు … పాల వాళ్లను.. వీధి చివర ఉండే చిల్లర కొట్టు వాళ్లను.. చెప్పుల దుకాణాల వారినిప్రశ్నిస్తూ టైం పాస్ చేస్తోంది. ఈ పరిణామాల నేపధ్యంలో… వైఎస్ వివేకా హత్య కేసును మరితంగా ప్రజల్లోకి తీసుకెళ్లేందుకు టీడీపీ నేతలు చేస్తున్న ప్రయత్నాలు ఫలిస్తున్నాయి. గతంలో సాక్షి పత్రిక చేసిన ప్రచారం… ఇప్పుడు మరోసారి సోషల్ మీడియాలో వైరల్ కావడం.. వైసీపీకి కూడా ఇబ్బందికరంగా మారింది.
