ఆర్ఆర్ఆర్‌.. రాజమౌళి దర్శకత్వంలో రామారావు (జూనియర్ ఎన్టీఆర్), రామ్‌చ‌ర‌ణ్‌ హీరోలుగా నటించనున్న సినిమా. ‘ఆర్ఆర్ఆర్‌’ అనేది వర్కింగ్ టైటిలే అయినప్పటికీ జనాలకు ఎక్కేసింది. రాజమౌళి కథానాయికల విషయంలోనూ ‘ఆర్’ సెంటిమెంట్ కంటిన్యూ చేస్తున్నాడని… ఎన్టీఆర్, చరణ్ సరసన నటించే హీరోయిన్ల పేర్లు ‘ఆర్’తో మొదలైతే బావుంటుందని ఆలోచిస్తున్నాడని గతంలో ప్రచారం జరిగింది. రాశిఖన్నా, రకుల్ ప్రీత్ సింగ్, రష్మిక మండన్న పేర్లు పరిశీలనలో వున్నాయని పుకార్లు షికార్లు చేశాయి. అవేవీ నిజం కాదని తరవాత తెలిసింది. తరవాత కీర్తీ సురేష్ పేరు వినిపించింది. తాజాగా సమంత పేరు వచ్చింది. అయితే… రాజమౌళి సినిమాలో నటించే అవకాశాన్ని ఆమె తిరస్కరించిందని వార్తలొచ్చాయి. వీటిని సమంత ఖండించారు. “రాజమౌళి గాని, ఆయన ‘ఆర్ఆర్ఆర్‌’ యూనిట్ సభ్యులు గాని… ఇప్పటివరకూ నన్నెవరూ సంప్రతించలేదు. నన్ను ఎవరూ అడగనప్పుడు నేను ఎలా ఆ అవకాశాన్ని తిరస్కరిస్తాను. ఆ వార్తలు పూర్తిగా నిరాధారమైనవి” అని సమంత పేర్కొన్నారు. ఈ సినిమా గురించి తరచూ ఏదో ఒక వార్త లేదా పుకారు బయటకు వస్తుంది. రాజమౌళి అండ్ కో ఎవరూ వాటిపై స్పందించడం లేదు.