సంపూ తుఫాను కాదు.. సునామీ

కొబ్బ‌రిమ‌ట్ట‌లో సంపూర్నేష్ బాబు చెప్పిన లెంగ్తీ డైలాగ్ దిట్టంగా జ‌నంలోకి వెళ్లిపోతుంది. బ్ల‌డీ ఫూల్ అంటూ.. సుదీర్ఘంగా సాగిన సంపూ డైలాగ్ ఇప్పుడు టాక్ ఆఫ్ ది టౌన్‌. నిన్న యూ ట్యూబ్‌లో విడుద‌ల చేసిన కొబ్బ‌రి మ‌ట్ట టీజ‌ర్‌కి అనూహ్య స్పంద‌న వ‌స్తోంద‌ట‌. తొలి రోజే ఏకంగా 3 ల‌క్ష‌ల వ్యూస్ వచ్చాయ‌ని సంబ‌ర‌ప‌డుతోంది చిత్ర‌బృందం. చిన్న సినిమాల టీజ‌ర్ల‌లో ఇది ఆల్ టైమ్ రికార్డ‌ని, సంపూ ముందు చెప్పి వ‌చ్చే తుఫాన్ కాదు, వ‌చ్చాక తెలిసే సునామీ అంటూ… సంపూ వీర‌త్వానికి ప్ర‌తీక‌గా ఓ పోస్ట‌ర్‌ని కూడా విడుద‌ల చేసింది కొబ్బ‌రిమ‌ట్ట టీమ్‌.

ఆడ‌దంటే.. అంటూ ఆడ‌దాని గొప్ప‌ద‌నం చెప్పిన సంపూ.. మ‌గాళ్ల‌మీద కూడా ఓ డైలాగ్ వ‌దిలాడ‌ట‌. అది ఈ డైలాగ్ కంటే లెంగ్తీ అట‌. దాన్ని థియేట‌ర్లోనే చూడండి అంటోంది చిత్ర‌బృందం. సంపూ హృద‌యకాలేయం చిన్న సినిమాగా విడుద‌లైనా మంచి వ‌సూళ్లు సాధించింది. ఇప్పుడు కొబ్బ‌రిమ‌ట్ట కూడా కాసుల వ‌ర్షం కురిపిస్తుంద‌ని చిత్ర‌బృందం న‌మ్మ‌కంగా చెబుతోంది. అంతా సంపూ మాయ‌. ఆయ‌న ఏదైనా చేయ‌గ‌ల‌డు.