చిత్ర‌సీమ‌లో సెంటిమెంట్లు ఎక్కువ. న్యూమ‌రాల‌జీని ఎక్కువ‌గా న‌మ్ముతుంటారు. పేర్లు మార్చుకోవ‌డం, స్పెల్లింగ్ స‌రిదిద్ద‌డం ఈ కోవ‌లోకే వ‌స్తుంటాయి. సాయిధ‌ర‌మ్ తేజ్ త‌న పేరు రెండు మూడుసార్లు మార్చాడు. సాయితేజ్‌, ద‌ర్గ‌తేజ్‌…. ఇలా మారుతూ వెళ్లింది. ఇప్పుడు సందీప్ కిషన్ కూడా త‌న పేరులో చిన్న మార్పు చేశాడు. Sundeep Kishan పేరు కాస్త.. Sandeep Kishn గా మారింది. అంతే కాదు. పీపుల్స్ స్టార్ అనే బిరుదు కూడా పెట్టుకొన్నాడు.
త‌న కొత్త సినిమా పోస్ట‌ర్ ‘మ‌జాకా’లో పీపుల్స్ స్టార్ గా త‌న‌ని తాను ప‌రిచ‌యం చేసుకొన్నాడు సందీప్ కిషన్. ఇదేం కొత్త బిరుదు కాదు. అభ్యుద‌య చిత్రాలు తీసే.. ఆర్‌.నారాయ‌ణ మూర్తిని అంద‌రూ పీపుల్స్ స్టార్ అని పిలుచుకొంటారు. ప్ర‌జ‌ల కోసం, వాళ్ల స‌మ‌స్య‌ల కోసం సినిమాలు తీస్తాడు కాబ‌ట్టి, ఆయ‌న‌కు ఆ బిరుదు పెట్ట‌డంలో న్యాయం ఉంది. అయితే సందీప్ కిషన్ పీపుల్స్ స్టార్ ఎలా అయ్యాడో. ప్ర‌తీ హీరోకీ ఏదో ఓ ట్యాగ్ ఉండాలి కాబ‌ట్టి, తాను పీపుల్స్ స్టార్ అయిపోయాడేమో..?
బిరుదులు, పేర్ల సంగ‌తి అటుంచితే సందీప్ టాలెంటెడ్. ఈ విష‌యంలో సందేహం లేదు. జ‌యాప‌జ‌యాల‌తో సంబంధం లేకుండా త‌న కెరీర్ సాగుతోంది. చాలా ఆశ‌లు పెట్టుకొన్న ‘మైఖెల్‌’ త‌న‌ని బాగా నిరాశ ప‌రిచింది. అయితే ‘ఊరు పేరు భైర‌వ‌కోన’ తో కాస్త ఉప‌శ‌మ‌నం ల‌భించింది. ఇప్పుడు ‘మ‌జాకా’పై చాలా ఆశ‌లే పెట్టుకొన్నాడు. త్రినాథ‌రావు నక్కిన ద‌ర్శ‌క‌త్వం వ‌హించిన ఈ చిత్రం 2025 సంక్రాంతికి విడుద‌ల అవుతోంది.
