పవర్ స్టార్ పవన్ కళ్యాణ్ ట్రెండ్ సెట్టర్ మూవీ గబ్బర్ సింగ్ కు కొనసాగింపుగా కాకపోయినా ఆ సినిమా టైటిల్ కు ముందు సర్ధార్ అని పెట్టి మరోసారి బాక్సాఫీస్ మీద యుద్ధం చేయడానికి వస్తున్నాడు పవన్ కళ్యాణ్. అత్తారింటికి దారేది తర్వాత గోపాలా గోపాలలో గెస్ట్ రోల్ చేసిన పవర్ స్టార్ సినిమా ఆ మాత్రమన్నా వసూళ్లను రాబట్టడానికి కారకుడయ్యాడు. ఇక ప్రస్తుతం తను నటిస్తున్న సర్ధార్ గబ్బర్ సింగ్ శరవేగంగా షూటింగ్ జరుపుకుంటుంది.
ఇప్పటికే చాలా ఆలస్యమైన ఈ సినిమా కోసం పవన్ రేయింబవళ్లు కష్టపడి చిత్రీకరణ జరుపుతున్నాడట. ప్రస్తుతం హైదరాబాద్ పరిసర ప్రాంతాల్లో చిత్రీకరణ జరుపుకుంటున్న ఈ సినిమా ఏప్రిల్ లో విడుదల చేస్తామని అధికారిక ప్రకటన ఇచ్చారు. అయితే తాజాగా ఈ సినిమా ఆడియోని మార్చ్ 12న విడుదల చేసేలా ప్లాన్ చేస్తున్నారు. కాజల్ కథానాయికగా నటిస్తున్న ఈ సినిమాలో రాయ్ లక్ష్మి ఓ స్పెషల్ సాంగ్ లో నర్తిస్తుంది.
ఈరోస్ ఇంటర్నేషనల్ బ్యానర్ లో నిర్మితమవుతున్న సర్ధార్ గబ్బర్ సింగ్ సినిమా పవన్ కళ్యాణ్ క్రియేటివ్ వర్క్స్ బ్యానర్లో శరత్ మారర్ నిర్మించడం జరుగుతుంది. దేవి శ్రీ ప్రసాద్ మ్యూజిక్ అందించిన ఈ సినిమా మరోసారి పవర్ స్టార్ అభిమానులకు కచ్చితంగా పండుగ వాతావరణం తీసుకొచ్చేలా ఉంటుందని భావిస్తున్నారు.
