అనిల్ రావిపూడి-మహేష్ కాంబినేషన్ లో ప్లాన్ చేస్తున్న సరిలేరు నీకెవ్వరు సినిమాలో రైలు కామెడీ గురించి ఇప్పటికే వార్తలు బయటకు వచ్చాయి. గతంలో శ్రీనువైట్ల వెంకీ సినిమాలో చేసిన ట్రయిన్ కామెడీ లాంటిది ఈ సినిమాలో అనిల్ రావిపూడి చేయబోతున్నాడన్నది ఆ వార్తలు సారాంశం. ఇప్పుడు ఇదే సీన్ మీద మరిన్ని అప్ డేట్స్ బయటకు వస్తున్నాయి.
కాశ్మీర్ లో మిలటరీ దళంలో పని చేసే హీరో, ఆంధ్రకు ట్రయిన్ లో బయలుదేరతాడట. ఆ సందర్భంగానే ఈ కామెడీ సీన్లు వుంటాయి. కాశ్మీర్ టు ఆంధ్ర ట్రయిన్ జర్నీ అంటే చాలా టైమ్ పడుతుంది.అందుకే సినిమా తొలిసగంలో ఈ ట్రయిన్ ఎపిసోడ్ కాస్త లెంగ్తీగానే వుంటుందని తెలుస్తోంది. ఈ ఎపిసోడ్ లోనే బండ్ల గణేష్ తో పాటు పలువురు కమెడియన్లు కనిపిస్తారు.
ఈ ట్రయిన్ ఎపిసోడ్ కోసం అన్నపూర్ణ సెవెన్ ఏకర్స్ లో ఏకంగా ఓ రైలు సెట్ నే వేస్తున్నారు. ఎక్కువ షూట్ వుంటుంది కాబట్టి, రియల్ ట్రయిన్ లో తీయడం అంత సాధ్యం అయ్యే పని కాదు. అందుకే సెట్ వేస్తున్నారు. ఇందుకోసం కాస్త భారీగానే ఖర్చు చేస్తున్నారు. సరిలేరు నీకెవ్వరు సినిమా ఈ సెట్ మీదకు ఆగస్టులో వస్తుందని తెలుస్తోంది.
