ఈ సంక్రాంతి వ‌స్తున్న రెండు సింహాల‌తో త‌ల‌ప‌డ‌బోతోంది శ‌తమానం భ‌వతి సినిమా! దిల్‌రాజు బ్యాన‌ర్ నుంచి వ‌స్తున్న సినిమా కావ‌డం, ప‌చ్చ‌ద‌నం, ప‌ల్లెటూరి అనుబంధం, మ‌న మూలాలు తెలిపే క‌థ కావ‌డం, శ‌ర్వానంద్‌, అనుప‌మ ప‌ర‌మేశ్వ‌ర‌న్ జంట‌గా క‌నిపించ‌డంతో ఈ సినిమాపై ఫోక‌స్ ప‌డింది. అయితే రెండు పెద్ద సినిమాల‌తో పోటీ ప‌డ‌గ‌ల‌దా? అనే సందేహాలూ వ్య‌క్తం అవుతున్నాయి. కానీ.. దిల్‌రాజు మాత్రం ధైర్యంగా ఈనెల 14న ఈ సినిమాని విడుద‌ల చేస్తున్నా… అని ప్రక‌టించేశాడు. ఇప్పుడు ట్రైల‌ర్ కూడా వచ్చేసింది.

పేరు లానే.. ట్రైల‌ర్ కూడా ప్ర‌శాంతంగా, ఎలాంటి హ‌డావుడీ లేకుండా సాగిపోయింది. విదేశాల నుంచి, సంక్రాంతి పండ‌గ కోసం సొంత వూరు వ‌చ్చిన కుటుంబాలు, వాళ్ల‌మ‌ధ్య ఓ ప్రేమ‌జంట‌… భావోద్వేగాలు, చ‌క్క‌టి సంగీతం – ఇలా క‌ల‌ర్ ఫుల్‌గా సాగిపోయింది. సినిమా భాష‌లో చెప్పాలంటే.. ట్రైల‌ర్ పాసై పోయిందంతే. ”అరె.. ఈ డైలాగ్ భ‌లే వుందే..” అనే పుల‌కింత‌గానీ, ”ఈ సినిమా త‌ప్ప‌కుండా చూడాల్సిందే” అనే ఉత్సాహంగానీ ఎందుక‌నో ట్రైల‌ర్ చూస్తుంటే క‌నిపించ‌లేదు. ప్ర‌కాష్ రాజ్ లాంటి న‌టుడ్ని పెట్టుకొని ఆయ‌న చేత ట్రైల‌ర్‌లో ఒక్క డైలాగూ ప‌లికించ‌క‌పోవ‌డం విడ్డూరంగా… వెలితిగా అనిపిస్తోంది. రెండు పెద్ద సినిమాల్ని ఢీ కొనేట‌ప్పుడు దిల్‌రాజు ఇంకా ఏదో ఇంట్ర‌స్టింగ్ ఎలిమెంట్‌తో రావాల్సిందేమో అనిపిస్తోంది. కాక‌పోతే.. మ‌నుషులు, మూలాలు, అనుబంధం, పల్లెటూరు అంటే… సంక్రాంతి సీజ‌న్ కాబ‌ట్టి వ‌ర్క‌వుట్ అయిపోతుంద‌ని దిల్‌రాజు భావించి ఉంటాడు. శ‌ర్వా, అనుప‌మ జోడీ చూడ‌ముచ్చ‌ట‌గా క‌నిపిస్తోంది. జ‌య‌సుధ‌, ప్ర‌కాష్‌రాజ్‌, న‌రేష్‌.. ఇలా కాస్టింగ్ కూడా భారీగా ఉంది. వాటితో పాటు దిల్ రాజు బ్రాండ్‌.. సంక్రాంతి సీజ‌న్ ఈ సినిమాకి శ్రీ‌రామ‌ర‌క్ష‌.