స‌త్య‌దేవ్ ద‌గ్గ‌ర ఓ మంచి క్వాలిటీ ఉంది. త‌న క‌థ‌ల ఎంపిక బాగుంటుంది. ఏ క‌థ ఎంచుకొన్నా, అందులో ఏదో ఓ కొత్తద‌నం క‌నిపిస్తుంది. త‌న కొత్త సినిమా `జిబ్రా`లోనూ అలాంటి నావ‌ల్టీ ఉంద‌న్న భ‌రోసా క‌లుగుతోంది. ఈశ్వ‌ర్ కార్తీక్ ద‌ర్శ‌క‌త్వం వ‌హించిన చిత్ర‌మిది. డాలీ ధ‌నుంజ‌య, ప్రియ భ‌వానీ శంక‌ర్‌, స‌త్య‌రాజ్‌, సునీల్, స‌త్య కీల‌క పాత్ర‌లు పోషించారు. దీపావ‌ళి సంద‌ర్భంగా అక్టోబ‌రు 31న విడుద‌ల చేస్తున్నారు. ఈరోజు టీజ‌ర్ వ‌దిలారు. టీజ‌ర్ లో క‌థేంటో స్ప‌ష్టంగా తెలియ‌క‌పోయినా, ఇదో క్రైమ్ థ్రిల్ల‌ర్ అనే సంగ‌తి మాత్రం అర్థ‌మ‌వుతోంది. సినిమాలో ఉన్న అన్ని పాత్ర‌ల్నీ ప‌రిచ‌యం చేసేశారు. వాళ్ల గెట‌ప్పులూ, సెట‌ప్పులు కొత్త‌గా అనిపించాయి. ముఖ్యంగా సునీల్, స‌త్య‌రాజ్ నెవ‌ర్ బిఫోర్ అవ‌తారాల్లో క‌నిపిస్తున్నారు. ధైర్య‌వంతుల‌కు అదృష్టం కూడా క‌లిసొస్తుంద‌న్న‌ది ఓ నానుడి. ఈ క‌థ కూడా అదే చెప్ప‌బోతోంది. ఈమ‌ధ్య కాలంలో టాప్ క‌మెడియ‌న్ గా ఎదుగుతున్నాడు స‌త్య‌. ఈ సినిమాలోనూ త‌న పాత్ర గ‌ట్టిగా పేల‌బోతోంద‌ని అర్థ‌మ‌వుతోంది. చివ‌ర్లో `ఈ పాస్ వ‌ర్డ్ ని ఎవ‌రూ గెస్ చేయ‌లేరు` అన్న‌చోట స‌త్య మార్క్ కామెడీ టైమింగ్ న‌వ్విస్తుంది.

ర‌వి బ‌స్రూర్ ఇచ్చిన బ్యాక్ గ్రౌండ్ స్కోర్ టీజ‌ర్‌ని బాగా ఎలివేట్ చేసింది. తెల్ల గుర్రం, కార్లు, ఓడలు, విమానం, ఆవు.. ఇలా టీజ‌ర్‌లా చాలా విష‌యాల్ని ప్ర‌స్తావించారు. వాటికీ క‌థ‌కూ ఉన్న లింకేమిట‌న్న‌ది ఆస‌క్తిక‌రం. కాస్టింగ్ ప‌రంగా, కాన్సెప్ట్ ప‌రంగా ఈ సినిమాకి మంచి బ‌జ్ ఏర్ప‌డింది. రిలీజ్ డేట్ కూడా బాగానే కుదిరింది. పాన్ ఇండియా స్థాయిలో ఈ చిత్రాన్ని విడుద‌ల చేస్తున్నారు. మ‌రి ఈసారి స‌త్య‌దేవ్ అదృష్టం ఎలా ఉందో చూడాలి.