లీకువీరులు, ఫేక్ లుక్కుల రూపకర్తలు ఒక్కోసారి ఇండస్ట్రీ జనాల గుండెల్లో గుబులు రేపుతున్నారు. స‌డ‌న్‌గా సోషల్ మీడియాలో ఫలానా సినిమాలో స్టార్ హీరో లుక్కు లేదా లీక్డ్ వీడియో అంటూ చక్కర్లు కొడతాయి. వాటిలో కొన్ని ఒరిజినల్ అయితే… మరికొన్ని ఫేక్ అవుతాయి. ఒక్కోసారి ఫేక్ లుక్కులు ఒరిజినల్ అయితే బాగుంటుందని అభిమానులు కోరుకునేంత అందంగా ఒత్సాహిక డిజైనర్లు తమ ప్రతిభ చూపిస్తుంటారు. ‘శైలజారెడ్డి అల్లుడు’ సినిమాపై అటువంటి ప్రయోగమే చేశారు. అందులో యువసామ్రాట్ అక్కినేని నాగచైతన్య లుక్ అంటూ సోషల్ మీడియాలో ఓ పోస్టర్ వదిలారు. అయితే అది ఫేక్ లుక్కు అని నిర్మాణ సంస్థ స్పష్టం చేసింది. వారంలో ఒరిజినల్ లుక్ విడుదల చేస్తామని తెలిపింది. మారుతి దర్శకత్వంలో సితార ఎంటర్టైన్మెంట్స్ సంస్థ నిర్మిస్తున్న ‘శైలజారెడ్డి అల్లుడు’ సినిమా చిత్రీకరణ ప్రస్తుతం హైదరాబాద్‌లో జరుగుతుంది. అనూ ఇమ్మాన్యుయేల్ కథానాయికగా నటిస్తున్న ఈ సినిమాలో అత్తగా రమ్యకృష్ణ నటిస్తున్నారు.