చిత్రసీమ‌లో సెంటిమెంట్లు చాలా ఎక్కువ‌. ఎవ‌రైనా స‌రే, హిట్ కాంబినేష‌న్‌ని రిపీట్ చేయ‌డానికి ఎక్కువ ఆస‌క్తి చూపిస్తారు. అంతే త‌ప్ప ఫ్లాప్ కాంబోవైపు క‌న్నెత్తి కూడా చూడ‌రు. అయితే ఓ ఫ్లాప్ జోడీ మ‌రోసారి వెండి తెర‌పై క‌నిపించ‌బోతోంది. వాళ్లే శ‌ర్వానంద్ – సాయి ప‌ల్ల‌వి.

వీరిద్ద‌రి కాంబినేష‌న్ లో ‘ప‌డి ప‌డి లేచె మ‌న‌సు’ విడుద‌లైంది. అయితే ఆ సినిమాకి ఆద‌ర‌ణ ద‌క్క‌లేదు. ఫ్లాప్ లిస్టులో చేరిపోయింది. అయితే ఇప్పుడు ఈ కాంబోతో మ‌రో సినిమా రాబోతోంది. శ‌ర్వానంద్‌తో కిషోర్ తిరుమ‌ల ఓ సినిమా చేయ‌బోతున్నాడు. ఇప్ప‌టికే స్క్రిప్టు సిద్ధ‌మైంది. రామ్‌తో ‘రెడ్‌’ విడుద‌లైన త‌ర‌వాత‌… ఈ కాంబో ప‌ట్టాలెక్కుతుంది. ఈ సినిమాలో క‌థానాయిక‌గా సాయి ప‌ల్ల‌వి పేరు ప‌రిశీలిస్తున్నార్ట‌. క‌థానాయిక పాత్ర‌కు చాలా ప్రాధాన్యం ఉన్న సినిమా ఇది. అందుకే ద‌ర్శ‌కుడు సాయి ప‌ల్ల‌వి వైపు మొగ్గు చూపిస్తున్న‌ట్టు తెలుస్తోంది. ప‌డి ప‌డి లేచె మ‌న‌సు ఫ్లాప్ అయినా, అందులో శ‌ర్వా – ప‌ల్ల‌విల కెమిస్ట్రీ బాగా వ‌ర్క‌వుట్ అయ్యింది. ఇద్ద‌రి మ‌ధ్య ల‌వ్ సీన్లు బాగా వ‌చ్చాయి. ఆ న‌మ్మ‌కంతోనే కిష‌షోర్ తిరుమ‌ల ఈ ధైర్యం చేస్తున్న‌ట్టు తెలుస్తోంది. శ‌ర్వా ప్ర‌స్తుతం ‘శ్రీ‌కారం’ సినిమాతో బిజీగా ఉన్నాడు. అది పూర్త‌యిన వెంట‌నే ఈ కాంబో లో సినిమా ప‌ట్టాలెక్కుతుంది.