తమిళనాడు వ్యాపారవేత్త శేఖర్ రెడ్డి .. అక్కడి రాజకీయ పార్టీలకు కాకుండా.. ఆంధ్రప్రదేశ్‌లోని అధికార పార్టీకి భూరి విరాళం ఇచ్చారు. అది చిన్న మొత్తం కాదు. దాదాపుగా రెండున్నర కోట్ల రూపాయలు. మొత్తం వైసీపీకి ఏడాదిలో తొమ్మిదిన్నర కోట్ల రూపాయల విరాళం వస్తే అందులో ముఫ్పై శాతం శేఖర్ రెడ్డిదేనన్నమాట. అంతగా శేఖర్ రెడ్డికి వైసీపీపై ప్రేమ ఎందుకు పుట్టుకొచ్చిందో.. పెద్ద పెద్ద కార్పొరేట్ సంస్థల స్థాయిలో విరాళాలు ఎందుకిస్తున్నారో… అంచనా వేయడం పెద్ద కష్టమేం కాదనేది కొంత మంది చెప్పే మాట.
అరవ వ్యాపారవేత్త .. ఆయన వ్యాపారాలన్నీ తమిళనాడులోనే ఉన్నాయి. కానీ ఆంధ్రప్రదేశ్‌లో తరచరూ వార్తల్లోకి వస్తున్నారు. గత ప్రభుత్వ హయాంలోనే ఆయన టీటీడీ బోర్డు మెంబర్. పాత నోట్ల రద్దు సమయంలో కొత్త నోట్లు ఆయన ఇంట్లో ఆర్బీఐ చెస్ట్ రేంజ్లో బయటపడటంతో కలకలం రేగింది. అప్పట్లో ఆయన చంద్రబాబుకు బినామీ అని.. ఆ సొమ్మంతా చంద్రబాబుదేనని వాదించిన అప్పటి ప్రతిపక్ష నేత జగన్, ఆయన మీడియా… “సాక్ష్యాలతో సహా” ఆరోపించారు. ఆ సాక్ష్యాల్నీ ఏమైపోయాయో కానీ.. తాము అధికారంలోకి రాగానే ఆయనను నెత్తిన పెట్టుకోవడం.. ప్రారంభించారు. ఆయనపై ఆరోపణలతో ఏ టీటీడీ బోర్డుపదవి నుంచి గత ప్రభుత్వం పీకేసిందో.. అదే బోర్డు పదవిని ప్రస్తుత ప్రభుత్వం అప్పగించింది. అంతే కాదు.. ఆయనకు.. ఆయనకు చెందిన కంపెనీలకు పెద్ద ఎత్తున కాంట్రాక్టులిస్తున్నారన్న ప్రచారం కూడా జరుగుతోంది.
నిజానికి శేఖర్ రెడ్డి విషయంలో వైసీపీ చేసినంత రచ్చ ఇతర పార్టీలు చేసి ఉంటే… అధికారంలోకి వచ్చిన తర్వాత ఆయన నీడ కూడా తమ పార్టీపై పడకుండా జాగ్రత్త తీసుకుంటారు. ఏమైనా సంబంధాలు పెట్టుకోవాలంటే.. తెర వెనుకే పెట్టుకుంటారు. కానీ వైసీపీ ఆయనను తీసుకొచ్చి టీటీడీ బోర్డు మెంబర్‌ను చేసింది. ఏపీలో ఇసుక విధానం మార్చింది కూడా ఆయన కోసమేనన్న ప్రచారం జరుగుతోంది. శేఖర్ రెడ్డి కి కానీ ఆయనకు సంబంధం ఉన్న కంపెనీలకు కానీ.. ఎలాంటి ప్రయోజనం ఏపీ నుంచి జరిగినా.. వైసీపీ ఇంకా ఇంకా విమర్శలు ఎదుర్కొనే అవకాశం ఉంది.
