సమ్మర్ వేడి.. టాలీవుడ్ లో బాగానే కనిపిస్తోంది. సినిమాల ఫలితం ఎలా వున్నా… వారానికి ఓ కొత్త సినిమా వచ్చేస్తోంది. వారమంతా ఆ సినిమా కబుర్లే నడుస్తున్నాయి. మజిలీ, చిత్రలహరి ఆల్రెడీ వచ్చేశాయి. తరువాతి వారం.. జెర్సీ, కాంచన 3 విడుదలకు సిద్ధమవుతున్నాయి. 24న `సీత` రాబోతోంది. అయితే ఇప్పుడు సీత వచ్చేదీ రానిది.. వచ్చేవారం సినిమాల రిజల్ట్ పై ఆధారపడి వుంది.
తేజ దర్శకత్వంలో రూపొందిన చిత్రం `సీత`. కాజల్, బెల్లంకొండ సాయి శ్రీనివాస్ జంటగా నటించారు. 24న విడుదల అవ్వాల్సిన సినిమా ఇది. అయితే ఇంత వరకూ ప్రమోషన్లు మొదలవ్వలేదు. ఓ టీజర్ ని వదిలారంతే. పాటల్లో ఒక్కటి కూడా బయటకు రాలేదు. అసలు ఈ సినిమాని 24న విడుదల చేయాలా? వద్దా? అనే మీమాంశలో టీమ్ ఉన్నట్టు టాక్. మజిలీ హిట్టయి మంచి వసూళ్లు వస్తున్నాయి. దానికి తోడు చిత్రలహరి వచ్చింది. జెర్సీ విడుదలై మంచి టాక్ వస్తే గనుక.. ఈ మూడూ వసూళ్లను పంచుకుంటాయి. కాంచన 3కి మాస్ లో గిరాకీ బాగుండే అవకాశాలు ఉన్నాయి. ఈ సినిమాల మధ్య `సీత`ని వదలడం తేజకు ఇష్టం లేదు. కాస్త లేట్ గా అయినా ఫర్వాలేదు, మంచి డేట్ చూసుకుందామని తేజ భావిస్తున్నాడట. ఒక వేళ జెర్సీ, కాంచన 3 ఫలితాలు అటూ ఇటూ అయితే.. అప్పుడు సీత రావడానికి ఎలాంటి అభ్యంతరాలు వుండవు. అంటే సీత వస్తుందా? రాదా? అనేది తేలాలంటే .. జెర్సీ బొమ్మ పడాల్సిందే అన్నమాట.
