ఎస్‌.జె.సూర్య ప్ర‌తినాయ‌కుల్లో స్టార్ అయిపోయాడు. ‘మానాడు’, ‘స‌రిపోదా శ‌నివారం’ చిత్రాల్లో సూర్య పాత్ర‌ల‌కు మంచి అప్లాప్ వ‌చ్చింది. ఇప్పుడు ‘గేమ్ ఛేంజ‌ర్‌’లోనూ త‌నే విల‌న్‌. ఈ సినిమాలో విల‌న్ పాత్ర‌ని శంక‌ర్ ప్ర‌త్యేకంగా తీర్చిదిద్దార‌న్న‌ది ఇన్ సైడ్ వ‌ర్గాల టాక్‌. సూర్య కూడా ‘గేమ్ ఛేంజ‌ర్‌’కు సంబంధించిన విష‌యాలు అప్పుడ‌ప్పుడు లీక్ చేస్తూ హైప్ పెంచేస్తున్నాడు. ఇప్పుడు తాజాగా ఎస్‌.జె.సూర్య చేసిన ఓ ట్వీట్.. రామ్ చ‌ర‌ణ్ ఫ్యాన్స్ కు పూన‌కాలు తెచ్చేలా వుంది.

”ఇప్పుడే రెండు స‌న్నివేశాల‌కు డబ్బింగ్ పూర్తి చేశా. ఓ సీన్ రామ్ చ‌ర‌ణ్‌తో, మ‌రోటి శ్రీ‌కాంత్ తో. ఈ రెండు సీన్లు పూర్తి చేయ‌డానికి నాకు రెండు రోజులు ప‌ట్టింది. అవుట్ పుట్ మాత్రం ‘దీనెమ్మ దిమ్మ తిరిగి బొమ్మ క‌నిపించింది’ అనే స్థాయిలో ఉంటుంది. ఈ రెండు సీన్ల‌కూ పిచ్చి పిచ్చిగా అప్లాజ్ వ‌స్తుంది. థియేట‌ర్లో పోతారు.. మొత్తం పోతారు. ఇంత మంచి అవ‌కాశం ఇచ్చిన శంక‌ర్ గారికీ, దిల్ రాజు గారికీ థ్యాంక్స్‌” అంటూ ట్వీట్ చేశాడు సూర్య‌. ప్ర‌స్తుతం ఈ ట్వీట్ వైర‌ల్ గా మారింది. సూర్య పాత్ర క్లిక్ అయితే సినిమా హిట్టే అనే న‌మ్మ‌కం ప్రేక్ష‌కుల్లో ఉంది. మెగా ఫ్యాన్స్ కూడా ఈ సినిమాలో సూర్య విజృంభిస్తాడ‌నే అనుకొంటున్నారు. అదే నిజ‌మైతే.. గేమ్ ఛేంజ‌ర్ విజ‌యానికి తిరుగుండ‌దు. అయితే ఎక్క‌డో ఓ మూల కాస్త భ‌యం కూడా ఉంది. ‘భార‌తీయుడు 2’లోనూ సూర్య‌నే విల‌న్‌. అయితే ఆ పాత్ర‌ని శంక‌ర్ స‌రిగా వాడుకోలేదు. మ‌రి `గేమ్ ఛేంజ‌ర్‌`లో ఏం చేస్తాడో చూడాలి. ప్ర‌స్తుతానికైతే సూర్య ట్వీట్ తో ఈ సినిమా హైప్ ఇంకాస్త పెరిగింది. జ‌న‌వ‌రి 10న సంక్రాంతి కానుక‌గా ఈ చిత్రాన్ని విడుద‌ల చేస్తున్న సంగ‌తి తెలిసిందే. ఈ సినిమా నుంచి మూడో పాట‌గా ఓ మెలోడీ సాంగ్ ని త్వ‌ర‌లో విడుద‌ల చేయ‌బోతున్నారు.