అనుష్క ప్ర‌ధాన పాత్ర పోషిస్తున్న చిత్రం భాగ‌మ‌తి. 2018 జ‌న‌వ‌రిలో ఈ సినిమా విడుద‌ల కానుంది. ఈలోగా ప్ర‌మోష‌న్స్ కోసం యూవీ క్రియేష‌న్స్ రంగం సిద్ధం చేస్తోంది. ఇటీవ‌లే టీజ‌ర్ బ‌య‌ట‌కు వ‌చ్చింది. ఇప్పుడు ట్రైల‌ర్ కూడా రెడీగా ఉంది. జ‌న‌వ‌రి తొలి వారంలో ట్రైల‌ర్‌ని విడుద‌ల చేస్తారు. ఈ సినిమా కోసం ప్ర‌త్యేకంగా ఓ ప్ర‌మోష‌న‌ల్ సాంగ్‌ని రూపొందించాల‌నే ప్ర‌య‌త్నాల్లో ఉంది టీమ్‌. ఈ సినిమాలో ఉన్న‌ది ఒక్క పాటే. కాబ‌ట్టి.. ప్ర‌చారం కోసం అద‌నంగా ఓ పాట రూపొందిస్తున్నారు. ఈ పాట సినిమాలో ఉండ‌దు. కేవ‌లం ప్ర‌మోష‌న్ల కోస‌మే వాడుకుంటార‌న్న‌మాట‌. ప్ర‌స్తుతం సంగీత ద‌ర్శ‌కుడు త‌మ‌న్ అదే ప‌నిలో ఉన్నాడు. అశోక్ ద‌ర్శ‌క‌త్వం వ‌హించిన ఈ సినిమా పొలిటిక‌ల్ థ్రిల్ల‌ర్‌గా సాగ‌బోతోంది. ఈ క‌థంతా ఓ కోట చుట్టూ తిరుగుతుంది. ఆ కోట‌కి అయిదు వంద‌ల ఏళ్ల చ‌రిత్ర ఉంటుంది. ఆ కోట‌కీ, ఈ క‌థ‌కీ చిన్న పాటి లింకు కూడా ఉంటుంది. అదేంట‌న్న‌ది తెర‌పై చూడాలి. ట్రైల‌ర్‌లో క‌థ‌ని చూచాయిగా చెప్పే ప్ర‌య‌త్నం చేయ‌బోతోంది చిత్ర‌బృందం. ట్రైల‌ర్ చూస్తే ఈ సినిమా జోనర్‌పై ఓ అవ‌గాహ‌న వ‌చ్చే అవ‌కాశం ఉంది.