నేను ట్రెండ్ ని ఫాలో అవ్వ‌ను.. అంటే కుద‌ర‌దు. స్టార్ల‌యినా స‌రే, ట్రెండ్ ని ప‌ట్టించుకోవాల్సిందే, ఫాలో అవ్వాల్సిందే. లేదంటే వెనుక‌బ‌డిపోవ‌డం ఖాయం. చేసిన సినిమాలే చేస్తే… ప్రేక్ష‌కుల‌కే కాదు, ఆయా హీరోల‌కూ విసుగొస్తుంది. ఈ విష‌యాన్ని కాస్త ఆలస్యంగా గ‌మ‌నించాడు శ్రీ‌కాంత్‌. ఇప్ప‌టి వ‌ర‌కూ త‌న‌కు నప్పే రొటీన్ సినిమాలే చేసుకొచ్చిన శ్రీ‌కాంత్‌… ఇప్పుడు ట్రెండ్ మార్చాడు. ప్ర‌స్తుతం హార‌ర్ కామెడీ జోన‌ర్ బాగా న‌డుస్తోంది. చిన్న సినిమాలు పెద్ద విజ‌యాలు సాధిస్తున్నాయి. అందుకే…. తాను ఓ హార‌ర్ సినిమా చేసేశాడు. అదీ గ‌ప్ చుప్‌గా. ఈ చిత్రానికి డాన్స్ మాస్ట‌ర్ అమ్మ రాజశేఖ‌ర్ ద‌ర్శక‌త్వం వ‌హిస్తున్నాడు.

ఈ సినిమాకి ఇప్పుడు టైటిల్ కూడా ఫిక్స‌య్యింది. అదే… ఘోస్ట్ ఈజ్ సీక్రెట్ ఆఫ్ మై ఎన‌ర్జీ! టైటిల్‌ని బ‌ట్టి చూస్తే ఇదో దెయ్యం క‌థ అని అర్థ‌మైపోతుంది. శ్రీ‌కాంత్ కూడా ఇదే మాట చెబుతున్నాడు. ఈమ‌ధ్య దెయ్యం క‌థ‌లు బాగా ఆడుతున్నాయ‌ని, అందుకే తానూ ఓ ప్ర‌య‌త్నం చేశాన‌ని చెబుతున్నాడు. షూటింగ్ పూర్తి చేసుకొన్న ఈ సినిమా.. అతి త్వ‌ర‌లో ప్ర‌మోష‌న్లు మొద‌లెట్ట‌బోతోంది. హిట్లు లేని అమ్మ‌రాజ‌శేఖ‌ర్‌నీ, శ్రీ‌కాంత్‌నీ ఈ దెయ్యం ఎంత వ‌ర‌కూ ఆదుకొంటుందో, ఎంత ఎన‌ర్జీ ఇస్తుందో మ‌రి.