శ్రీ‌కాంత్ ఇంటి నుంచి వ‌స్తున్న హీరో.. రోష‌న్‌. నిర్మ‌లా కాన్వెంట్‌లో క‌థానాయ‌కుడిగా న‌టించాడు. ఈ సినిమాతో రోష‌న్ భ‌విష్య‌త్తు ముడిప‌డి ఉంది. శ్రీ‌కాంత్ కూడా త‌న‌యుడిపై చాలా ఆశ‌లే పెట్టుకొన్నాడు. మొద‌టి సినిమా అన్న‌పూర్ణ బ్యాన‌ర్‌లో ప‌డడం, నాగార్జున ఆ సినిమాలో కీల‌క పాత్ర పోషించ‌డంతో… శ్రీ‌కాంత్ చాలా హ్యాపీగా ఉన్నాడు. సినిమా కూడా బాగా వ‌చ్చింద‌ని తెలియ‌డంతో… ఈసినిమాకి కావ‌ల్సినంత ప్ర‌మోష‌న్ దండుకొని, త‌న‌యుడ్ని ప్ర‌మోట్ చేసుకోవాల‌ని ప్లాన్ వేస్తున్నాడు శ్రీ‌కాంత్‌.

శ్రీ‌కాంత్‌ది వంద సినిమాల అనుభ‌వం. ఇండ్ర‌స్ట్రీలో అంద‌రికీ కావాల్సిన వాడే. చిరంజీవి నుంచి, రామ్‌చ‌ర‌ణ్ వ‌ర‌కూ దాదాపు అంద‌రు అగ్ర హీరోల‌తోనూ క‌ల‌సి ప‌నిచేశాడు. మ‌రీ ముఖ్యంగా మెగా ఫ్యామిలీకి బాగా కావ‌ల్సిన‌వాడు. అందుకే.. వాళ్లంద‌రినీ ఈసినిమా ప్ర‌మోష‌న్ల‌కు విరివిగా వాడుకోవాల‌ని భావిస్తున్నాడ‌ట‌. ఆడియో ఫంక్ష‌న్లు, టీజ‌ర్ లాంచ్‌లూ, స‌క్సెస్ మీట్లూ ఇలా ప్ర‌తీ వేడుకా.. ఓ హీరోతో చేయించాల‌ని చూస్తున్నాడు. ఈ సినిమాలో నాగార్జున హ్యాండు కూడా ఉండ‌డంతో.. ప్ర‌మోష‌న్ల‌కు ఎలాంటి ఆటంకం క‌లిగే అవ‌కాశం లేదు.. సో.. నిర్మ‌లా కాన్వెంట్ ప్ర‌మోష‌న్ల‌లో హీరోలంద‌రినీ చూడొచ్చ‌న్న‌మాట‌. మొత్తానికి రోష‌న్‌ టేకాఫ్ ప‌రంగా ఓ తండ్రి గాఏం చేయాలో అవ‌న్నీ చేస్తున్నాడు శ్రీ‌కాంత్‌. మ‌రి ఫ‌లితం ఎలా ఉంటుందో?