రామ్ చ‌ర‌ణ్ కెరీర్‌లో `రంగ‌స్థ‌లం` ఓ మైలు రాయి. సుకుమార్ ని మ‌రో మెట్టు ఎక్కించిన సినిమా అది. క‌థ, క‌థ‌నం, ట్విస్టు, పాట‌లు, క్యారెక్టరైజేష‌న్లు.. ఇలా అన్ని విష‌యాల్లోనూ రంగ‌స్థ‌లం మెప్పించింది. అందుకే అంత పెద్ద విజ‌యాన్ని అందుకుంది. ఈ సినిమాని చ‌ర‌ణ్ ఎప్ప‌టికీ మ‌ర్చిపోడు. ఈ సినిమాలో చ‌ర‌ణ్ – స‌మంత‌ల కెమిస్ట్రీ అదిరిపోయింది. దానికి తోడు ఓ లిప్ లాక్‌కూడా. అయితే ఈ లిప్ లాక్ వెనుక చాలా పెద్ద క‌థ న‌డిచిందట.
సుకుమార్ చ‌ర‌ణ్‌కి స్క్రిప్టు చెప్పిన‌ప్పుడే ఈ లిప్ లాక్ సీన్ ఉంది. ఈ సీన్ గురించి చ‌ర‌ణ్ – సుకుమార్ మ‌ధ్య పెద్ద చ‌ర్చ న‌డిచింది. అప్ప‌టికి చ‌ర‌ణ్ కి పెళ్ల‌యిపోయింది. అందుకే ‘లిప్ లాక్ సీన్లు వ‌ద్దు.. ఉపాస‌న‌కు ఇలాంటివి ఇష్టం ఉండ‌దు’ అని ఖ‌రాఖండీగా చెప్పేశాడ‌ట. దానికి సుకుమార్ కూడా ‘స‌రే’ అన్నాడట. కానీ… ఈ సీన్ ఎంత అవ‌స‌ర‌మో.. సుక్కుకి తెలుసు. క‌చ్చితంగా ఈసీన్ ఉండాల్సిందే అనుకున్నాడు. మెల్ల‌మెల్ల‌గా చ‌ర‌ణ్ ని ఒప్పిద్దాం అని ఫిక్స‌య్యాడు. ఈ సీన్ గురించి ఎప్పుడు చ‌ర్చ వ‌చ్చినా చ‌ర‌ణ్ మాత్రం మొహ‌మాటం లేకుండా `ఈ సీన్ వ‌ద్దు అన్నాను క‌దా` అని చెప్పేసేవాడ‌ట.
కానీ ఈ సీన్ చిత్రీక‌రించే రోజువ‌చ్చేసింది. ‘చ‌ర‌ణ్ కి లిప్ లాక్ పెట్టు..’ అని స‌మంత‌కి చెప్పి, చ‌ర‌ణ్ కి మాత్రం ‘పెదాలు ద‌గ్గ‌ర‌గా వ‌స్తాయంతే.. దాన్ని మ‌నం గ్రాఫిక్స్ లో చీట్ చేయొచ్చు’ అని చెప్పి.. షూట్ కి రెడీ చేశాడు. సుకుమార్ యాక్ష‌న్ చెప్ప‌గానే.. స‌మంత నేరుగా లిప్ లాక్ ఇచ్చేసింద‌ట. అది నిజంగా… చ‌ర‌ణ్ ఊహించని ట్విస్టు. దాంతో చ‌ర‌ణ్ సుకుమార్ పై అలిగాడ‌ని, కానీ.. ఈ సీన్ ఎంత ముఖ్య‌మో సుకుమార్ ఆ త‌ర‌వాత చ‌ర‌ణ్ కి అర్థ‌మ‌య్యేలా చెప్పి క‌న్వెన్స్ చేశాడ‌ట. మొత్తానికి లిప్ లాక్ సీన్.. అలా త‌యారైపోయింది. ఈ సినిమాలో చ‌ర‌ణ్ – స‌మంత పాత్ర‌ల మ‌ధ్య ఉన్న గాఢ‌త‌ని, ప్రేమ‌నీ అర్థం చేసుకోవ‌డానికి ఆ సీన్ ఎంతో ఉప‌యోగ‌ప‌డింది. ఓ స‌న్నివేశం తాము అనుకున్న‌ట్టుగా రావ‌డానికి ద‌ర్శ‌కులు ఏమైనా చేస్తారు. దానికి రంగ‌స్థ‌లం ఓ ఉదాహ‌ర‌ణ.
