ఈ రోజుల్లో టైటిల్స్ లో క్రియేటివిటీ క‌నిపిస్తోంది. టైటిల్ చూడ‌గానే సినిమాపై ఆస‌క్తి రేగుతోంది. కొంత‌మంది… తెలుగు భాష‌పై, మ‌న సంస్కృతిపై ఉన్న ప్రేమ‌ని సినిమా టైటిళ్ల‌పై చూపిస్తున్నారు. త్రివిక్ర‌మ్ లాంటి ద‌ర్శ‌కులు అచ్చ తెలుగు పేర్ల‌ని సినిమాల‌కు పెట్టి, భాష‌పై త‌మ‌కున్న ప్రేమ‌ని చాటు తున్నారు. అదే దారిలో కొత్త ద‌ర్శ‌కులూ వెళ్తున్నారు. సునీల్, శ్రీ‌నివాస‌రెడ్డి, వెన్నెల కిషోర్ ప్ర‌ధాన పాత్ర‌ధారులుగా ఓ చిత్రం రూపుదిద్దుకుంటోంది. దీనికి `భువ‌న విజ‌యం` అనే చ‌క్క‌టి టైటిల్ పెట్టారు.
భువ‌న విజ‌యం అనేది.. శ్రీ‌కృష్ణ దేవ‌రాయులు త‌మ సాహిత్య స‌భ‌కు పెట్టుకొన్న చ‌క్క‌టి పేరు. అష్ట‌దిగ్గ‌జాలు అని పిల‌వ‌బ‌డే అల్ల‌సాని పెద్ద‌న్న, తిమ్మ‌న, మ‌ల్ల‌న, ధూర్జ‌టి, తెనాలి రామ‌లింగ‌డు, రామ‌భ‌ద్ర క‌వి, పింగ‌ళి సూర‌న్న, రామ‌రాజ భూష‌ణుడు.. ఈ స‌భ‌లోనే ఉండేవారు. ఆ స‌భ పేరు ఇప్పుడు టైటిల్ అయ్యింది. శ్రీ‌కృష్ణ దేవ‌రాయుల స‌భ‌లో అష్ట దిగ్గ‌జాలు ఉన్న‌ట్టు ఈ సినిమాలోనూ 8మంది హాస్య న‌టులున్నారు. వైవాహ‌ర్ష, పృథ్వీ, ధ‌న్‌రాజ్ మిగిలిన పాత్ర‌లు పోషిస్తున్నారు. చ‌రణ్ ఈ సినిమాతో దర్శ‌కుడిగా ప‌రిచ‌యం అవుతున్నాడు. షూటింగ్ పూర్త‌యింది. త్వ‌ర‌లోనే విడుద‌ల చేస్తారు.
