2025 సంక్రాంతికి ఇంకా చాలా స‌మ‌యం ఉంది. అయితే… బెర్తులు మాత్రం ఫుల్ అయిపోతున్నాయి. 2025 సంక్రాంతికి వ‌చ్చేస్తామంటూ నిర్మాత‌లు ముంద‌స్తుగానే ప్ర‌క‌టించేస్తున్నారు. ఇప్ప‌టికే ‘విశ్వంభ‌ర’ సినిమా సంక్రాంతికి ఫిక్స‌య్యింది. నాగ‌చైత‌న్య ‘తండేల్‌’ కూడా సంక్రాంతినే టార్గెట్ చేసుకొంది. వెంక‌టేష్ – అనిల్ రావిపూడి కాంబోలో ఓ సినిమా రూపుదిద్దుకొంటోంది. ఈ సినిమానీ పండక్కే విడుద‌ల చేయ‌నున్నారు. ఇప్పుడు ఈ జాబితాలో మరో సినిమా చేరింది.
సూర్య ప్ర‌స్తుతం ‘కంగువ’ అనే సినిమా చేస్తున్నాడు. శివ ద‌ర్శ‌కుడు. ఆ త‌ర‌వాత కార్తీక్ సుబ్బ‌రాజు దర్శకత్వంలో ఓ సినిమా చేయ‌డానికి ఒప్పుకొన్నాడు. ఈరోజే ఈ సినిమాకు సంబంధించిన అధికారిక ప్ర‌క‌ట‌న కూడా వ‌చ్చేసింది. ఈరోజు సూర్య పుట్టిన రోజు సంద‌ర్భంగా చిత్ర‌బృందం ప్ర‌త్యేక‌మైన గ్లింప్స్ విడుద‌ల చేసింది. పూజా హెగ్డే క‌థానాయిక‌గా న‌టిస్తోంది. ఈ చిత్రాన్ని సంక్రాంతి కానుక‌గా విడుద‌ల చేయ‌బోతున్న‌ట్టు చిత్ర‌బృందం స్ప‌ష్టం చేసింది. సో… ఈ ముగ్గుల పండ‌క్కి సూర్య సినిమా కూడా రాబోతోంద‌న్న‌మాట.
Also Read: మొస‌లితో హీరో ఫైటింగ్‌!
గ్యాంగ్‌స్ట‌ర్‌కి సంబంధించిన క‌థ ఇది. సూర్య క్యారెక్ట‌రైజేష‌న్ కొత్త‌గా ఉండ‌బోతోంద‌ని టీమ్ చెబుతోంది. నిజానికి సుధా కొంగ‌ర దర్శకత్వంలో సూర్య ఓ సినిమా చేయాలి. స్క్రిప్టు కూడా సిద్ధ‌మైంది. అయితే కొన్ని అనివార్య కార‌ణాల వ‌ల్ల ఈ ప్రాజెక్ట్ నుంచి సూర్య త‌ప్పుకొన్నాడు. అత‌ని ప్లేస్‌లోకి శివ కార్తికేయ‌న్ చేరాడు. ఆ సినిమా స్థానంలోనే కార్తీక్ సుబ్బ‌రాజు చిత్రాన్ని ప‌ట్టాలెక్కించాడు సూర్య.
