మాటల్లేవ్… అభిమానుల నోట అరుపులే! ‘సైరా’గా చిరంజీవి సింహంలా దూసుకొచ్చారు. గర్జించారు. ‘బాహుబలి’ తరువాత తెలుగు చలనచిత్ర పరిశ్రమలో, భారతీయ తెరపై ఆ స్థాయిలో తెరకెక్కుతోన్న సినిమాగా ‘సైరా’ గురించి చెబుతున్నారు. ఈ రోజు విడుదలైన టీజర్ ఆ అంచనాలను అందుకుంది. సినిమాపై మరిన్ని అంచనాలు పెంచింది. భారత గడ్డ మీద బ్రిటీష్ పాలన, ఆ పాలకుల్ని ఎదిరించిన పాలేగాడు ఉయ్యాలవాడ నరసింహారెడ్డిగా చిరంజీవిని పరిచయం చేస్తూ టీజర్ కట్ చేశారు. అందులో నిర్మాణ విలువలు ఉన్నత స్థాయిలో వున్నాయి. కళ్ళతో చిరంజీవి పలికించిన రెండు మూడు క్షణాల రౌద్రం ఆకట్టుకుంటోంది. ఇది ‘బాహుబలి’ కాదు. మెగా ‘బాహుబలి’. పుట్టినరోజుకి ఒక్క రోజు ముందే చిరంజీవి అభిమానులకు, ప్రేక్షకులకు ‘సైరా’ టీజర్ రూపంలో భారీ బహుమతి ఇచ్చారు.