పాలమూరు- రంగారెడ్డి, దిండి ఎత్తిపోతల ప్రాజెక్టులకు సంబంధించి తెలంగాణ సర్కారు ఇన్నాళ్లూ చెబుతున్న మాటలన్నీ.. ‘అశ్వత్థామ హతః కుంజరః’ తరహా అర్థసత్యాలే! ఈ ప్రాజెక్టుల వలన ఆంధ్రప్రదేశ్‌ రాష్ట్రానికి అన్యాయం జరుగుతుందని రాయలసీమ సహా మరికొన్ని జిల్లాలు కనీస సాగునీరు కూడా లేకుండా ఎడారిగా మారుతాయని కొన్నాళ్లుగా ఏపీకి చెందిన దాదాపు అన్ని రాజకీయ పక్షాల వారు ఆందోళనలు చేస్తూ ఉన్న సంగతి తెలిసిందే. అయితే ఇవన్నీ రాష్ట్రం ఉమ్మడిగా ఉన్నప్పుడు సంకల్పించిన ప్రాజెక్టులే తప్ప కొత్తగా చేపడుతున్న ప్రాజెక్టులు కాదంటూ తెలంగాణ సర్కారు బుకాయిస్తూ వస్తున్నది. ఈ నేపథ్యంలో కొందరు రైతులు సుప్రీం కోర్టులో దాఖలు చేసిన పిటిషన్‌ విచారణ సందర్భంగా కేంద్ర జలసంఘం ఇచ్చిన అఫిడవిట్‌లో వారినుంచి ఎలాంటి అనుమతులు పొందకుండానే, కనీసం వారికి సమాచారం కూడా ఇవ్వకుండానే తెలంగాణ సర్కారు ఈ ప్రాజెక్టులను చేపడుతున్నట్లుగా తెలుస్తున్నది.
పాలమూరు- రంగారెడ్డి, దిండి ప్రాజెక్టులు తొలినుంచి వివాదాస్పదంగానే ఉన్నాయి. కృష్ణాజలాల వినియోగంతో ముడిపడిన ఈ ప్రాజెక్టులు గనుక పూర్తయి తెలంగాణ ఇష్టానుసారంగా వాడుకోవడం మొదలైతే రాయలసీమకు నీళ్లు అందడం దుర్లభం అవుతుంది. అయితే చంద్రబాబునాయుడు ప్రభుత్వం ఈ తెలంగాణ ప్రాజెక్టులను అడ్డుకోవడానికి చురుగ్గా వ్యవహరించడం లేదని, కేసీఆర్‌ సర్కారుకు ఏపీ ప్రయోజనాల్ని చంద్రబాబు తాకట్టు పెట్టేస్తున్నారని ఆరోపణలు వచ్చాయి. దానికి తగినట్లుగానే ప్రభుత్వం కూడా నిస్తేజంగా వ్యవహరిస్తూ వచ్చింది.
మధ్యలో ఏపీసీసీ చీఫ్‌ రఘువీరారెడ్డి నిరాహార దీక్ష చేసినా సర్కారులో స్పందన రాలేదు. తాజాగా జగన్మోహనరెడ్డి కూడా దీక్షకు సంకల్పించారు. ఈ నేపథ్యంలో తెలంగాణ నాయకులు అందరూ కలిసి.. తమ ప్రాజెక్టులను అడ్డుకుంటూ ఉన్నారని ఏపీ నాయకులను చెడామడా తిట్టడం జరుగుతూ ఉన్నది తప్ప.. వారు కేంద్ర జలసంఘం నుంచి అనుమతులు తెచ్చుకోవడం మాత్రం జరగలేదు. తెలంగాణ నాయకులు ఎంతగా గట్టిగా అరుస్తూ ఏపీ నాయకులను తిడితే, అంతగా తమ వాదనలో న్యాయం ఉన్నదని అందరూ అనుకుంటారనే చందంగా వ్యవహరిస్తూ వచ్చారు. అయితే ఏపీ రైతులు సుప్రీంలో దాఖలు చేసిన పిటిషన్‌ విచారణలో వారు అసలు కేంద్ర జలసంఘానికి సమాచారమే ఇవ్వలేదనే వాస్తవం బయటపడింది. దీనిపై ఎలాంటి తీర్పు వస్తుందో..? ఈ ప్రాజెక్టులను ఎలా అడ్డుకోవడం జరుగుతుందో వేచిచూడాలి!
