అండమాన్‌లోని పోర్ట్ బ్లెయిర్ మున్సిపల్ కార్పొరేషన్ పీఠాన్ని టీడీపీ కైవసం చేసుకుంది. బీజేపీ మద్దతుతో ఈ పదవి దక్కింది. ఇది గొప్ప ముందడుగు అన్నట్లుగా జేపీ నడ్డా.. టీడీపీ, బీజేపీ అలయన్స్ గురించి పోస్ట్ చేశారు. ఆ ట్వీట్ వైరల్ అయింది. నిజానికి పోర్టు బ్లెయిర్‌లో ఇప్పుడు ఎన్నికలు జరగలేదు. రెండున్నరేళ్ల కిందట జరిగాయి. అప్పట్లో టీడీపీ, బీజేపీ పొత్తు పెట్టుకోలేదు. విడివిడిగా పోటీ చేసాయి. టీడీపీ రెండుస్థానాల్లో గెలిచింది. ఆ రెండు స్థానాలే మేయర్ పీఠాన్ని ఎవరికి దక్కాలో డిసైడ్ చేస్తున్నాయి.
అప్పట్లో బీజేపీ నేతలు టీడీపీతో సంప్రదింపులు జరిపి పొత్తు కోసం అంగీకరింపచేశారు. దానిప్రకారం… మొదట బీజేపీ.. తర్వాత టీడీపీ మేయర్ పీఠాన్ని దక్కించుకోవాలి. మొదట బీజేపీ తీసుకుంది. వారి టర్మ్ అయిపోయిన తర్వాత పద్దతిగా టీడీపీకి అప్పచెప్పింది. టీడీపీకి ఉన్న ఇద్దరు కౌన్సిలర్లు ఇతర పార్టీలు ఎంత ప్రలోభ పెట్టినా లొంగలేదు. ఆ ఇద్దర్నీ చేర్చేసుకుంటే పదవి ఇవ్వాల్సిన అవసరం ఉండదుగా అని బీజేపీ ఆలోచించి కార్యాచరణ ఖరారు చేసుకుని ఉంటే పరిస్థితి ఎలా ఉండేదో కానీ.. టీడీపీ, బీజేపీ పొత్తు అనే అభిప్రాయాన్ని కల్పించడానికి .. .మాత్రం నడ్డా ఈ విషయాన్ని హైలెట్ చేశారు.
టీడీపీ అంటే తెలుగు రాష్ట్రాలు అనే చూస్తారు. అండమాన్‌లో టీడీపీ ఉనికి ఆ పార్టీ నాయకత్వానికే తెలుసు. అలాంటిది నడ్డా ఇప్పుడు… టీడీపీ అండమాన్ లోనూ ఉందని జాతీయ స్థాయిలో చూపించడమే కాదు.. తాము టీడీపీతో పొత్తులో ఉన్నామనట్లగా సందేశం పంపారు. అండమాన్ లో కలిసినప్పుడు తెలుగు రాష్ట్రాల్లో ఎందుకు కలవకూడదని ఆయన సందేశం ఇచ్చారేమో కానీ ముందు ముందు పరిస్థితులు మరింత మారిపోయే అవకాశం ఉంది. పోర్టు బ్లెయిర్ నుంచి పొత్తు.. ఏపీకి వచ్చినా ఆశ్చర్యం లేదన్న వాదన అందుకే వినిపిస్తోంది.
