నంద‌మూరి బాల‌కృష్ణ‌… ఎప్పుడు ఎవ‌రికి అవ‌కాశం ఇస్తాడో ఊహించ‌డం చాలా క‌ష్టం. అందుకే ఆశ్చ‌ర్య‌పోయే కాంబోలు సెట్ అయిపోతుంటాయి. పూరి – బాల‌య్య కాంబో ఎవ్వ‌రూ ఊహించలేదు. సినిమాల‌కు దూరంగా ఉంటున్న బి.గోపాల్‌ని పిలిచి మ‌రీ అవ‌కాశం ఇచ్చే ప్ర‌య‌త్నాల్లో ఉన్నాడు బాల‌య్య‌. ఇప్పుడు తేజ‌కీ ఊహించ‌ని ఆఫర్ ఇచ్చిన‌ట్టు తెలుస్తోంది. ఇటీవ‌ల బాల‌య్య – తేజ మ‌ధ్య సినిమాకి సంబంధించిన చ‌ర్చ‌లు జ‌రిగిన‌ట్టు తెలుస్తోంది. ఒక‌ట్రెండు సార్లు ఇద్ద‌రూ భేటీ అయిన‌ట్టు విశ్వ‌స‌నీయ వ‌ర్గాల స‌మాచారం. ప్ర‌స్తుతం బాల‌య్య ద‌గ్గ‌ర ఎన్టీఆర్ ఆత్మ‌క‌థ స్క్రిప్టు రూపంలో రెడీగా ఉంది. దాన్ని టేక‌ప్ చేసే ద‌ర్శ‌కుడి కోసం బాల‌య్య అన్వేషిస్తున్నాడు. ఈ విష‌యానికి సంబంధించి తేజ‌తో బాల‌య్య మంత‌నాలు చేసిన‌ట్టు తెలుస్తోంది. అయితే తేజ ఇంకా త‌న నిర్ణ‌యం చెప్ప‌లేద‌ని స‌మాచారం. సురేష్ ప్రొడ‌క్ష‌న్స్‌లో `నేనే రాజు నేనే మంత్రి` రూపొందించాడు తేజ‌. అది మంచి హిట్ అయ్యింది. తేజ ఫామ్ లోకి వ‌చ్చాడు. అదే సురేష్ ప్రొడ‌క్ష‌న్స్‌లో మ‌రో సినిమా చేయ‌డానికి కూడా తేజ అంగీక‌రించాడ‌ని స‌మాచారం. ఆ సినిమా వెంక‌టేష్‌తో ప‌ట్టాలెక్కే అవ‌కాశాలున్నాయి. మ‌రి బాల‌య్య ఆఫ‌ర్‌కి తేజ ఎలా స్పందిస్తాడో చూడాలి.