‘హ‌ను-మాన్‌’తో సూప‌ర్ హీరో పాత్ర‌లో ఎంట్రీ ఇస్తున్నాడు తేజా స‌జ్జా. ఈ సినిమా సంక్రాంతి బ‌రిలో నిలిచింది. హ‌నుమాన్ కంటే సూప‌ర్ హీరో ఎవ‌రుంటారు..? మ‌రి.. సూప‌ర్ హీరోగా తేజా ఎలా చేస్తాడ‌న్న ఆస‌క్తి అంద‌రిలోనూ ఉంది. అయితే.. తేజా ఇప్పుడు మ‌రో సూప‌ర్ హీరో క‌థ‌ని ఎంచుకొన్నాడ‌ని స‌మాచారం. కార్తీక్ ఘ‌ట్ట‌మ‌నేని ద‌ర్శ‌క‌త్వంలో ‘ఈగ‌ల్‌’ వ‌స్తోంది. అయితే అంత‌కు ముందే తేజా స‌జ్జాతో ఓ సినిమా స్టార్ట్ చేశాడు కార్తీక్. ఇది… సూప‌ర్ హీరో క‌థ అని తెలుస్తోంది. పీపుల్ మీడియా ఫ్యాక్ట‌రీ సంస్థ ఈ చిత్రాన్ని నిర్మిస్తోంది.

ఇప్ప‌టి వ‌ర‌కూ దాదాపు 40 శాతం చిత్రీక‌ర‌ణ కూడా పూర్త‌యింద‌ని టాక్‌. ‘ఈగ‌ల్‌’ త‌ర‌వాత కార్తీక్ ఈ ప్రాజెక్ట్ ని పూర్తి చేస్తాడు. హ‌నుమాన్ బిజీలో ఉండ‌డం వ‌ల్ల తేజా, ఈగ‌ల్ ఛాన్స్ రావ‌డం వ‌ల్ల కార్తీక్ ఈ సూప‌ర్ హీరో క‌థ‌ని ప‌క్క‌న పెట్టారు. ఇప్పుడు ఇవి రెండూ సంక్రాంతికే రాబోతున్నాయి. సో… పండ‌గ త‌ర‌వాత సూప‌ర్ హీరో క‌థ‌ని మ‌ళ్లీ ప‌ట్టాలెక్కిస్తారు. ‘హ‌నుమాన్‌’ తేజా కెరీర్‌లోనే భారీ ప్రాజెక్ట్. అయితే ఇప్పుడు కార్తీక్ సినిమా అంత కంటే పెద్ద స్థాయిలో ఉండ‌బోతోంద‌ని టాక్‌. ఈ సినిమా నిండా చాలా విశేషాలున్నాయ‌ని స‌మాచారం. వాటిని చిత్ర‌బృందం ఒకొక్క‌టిగా రివీల్ చేయ‌బోతోంద‌ట‌. మ‌రి.. ఈ ప్రాజెక్ట్ కి సంబంధించిన తొలి అధికారిక ప్ర‌క‌ట‌న ఎప్పుడొస్తుందో చూడాలి.