తెలంగాణ తెలుగుదేశం లో మిగిలిన కీలక ఎమ్మెల్యేలు రేవంత్‌రెడ్డి, సండ్ర వెంకట వీరయ్య ఇరుక్కుని ఉన్న ఓటుకు నోటు కేసులో మరొక ఇంపార్టెంట్‌ నిందితుడు జెరూసలెం మత్తయ్య. వ్యవహారం రచ్చకెక్కిన తర్వాత.. ఆంధ్రప్రదేశ్‌లో షెల్టరు తీసుకుని… అక్కడిపోలీసులకు ఫిర్యాదు ఇచ్చి.. తెలంగాణ సర్కారు తనను బెదిరిస్తున్నదంటూ సంచలనం రేకెత్తించిన కీలక వ్యక్తి మత్తయ్య. తెలంగాణ సర్కారు వేధింపులు మీద హైకోర్టుకు వెళ్లి.. తనను అరెస్టు చేయడానికి వీల్లేదంటూ మధ్యంతర ఉత్తర్వులు కూడా తెచ్చుకుని ఇన్నాళ్లూ నిమ్మళంగా ఉన్నారు.
అయితే తాజాగా తెలంగాణ ఏసీబీ అధికారులు మత్తయ్యకు నోటీసులు ఇచ్చారు. ఈ కేసులో ‘చాలా వాస్తవాలు మీకు తెలిసి ఉంటాయి గనుక.. విచారణకు రావాలంటూ’ నోటీసులు ఇచ్చారు. హైకోర్టు ఉత్తర్వులున్నాయి గనుక.. మిమ్మల్ని అరెస్టు చేయం అని కూడా ఆ నోటీసుల్లో పేర్కొన్నారు. అయితే ఇప్పుడు ఓటుకు నోటు కేసు మళ్లీ మలుపులు తిరుగుతున్నట్లుగా కనిపిస్తోంది.
తెదేపా ఎమ్మెల్యేల కోసం ఆకర్ష పథకం కంటిన్యూ అవుతున్నప్పుడు జూబ్లీ హిల్స్‌ ఎమ్మెల్యే మాగంటి గోపీనాధ్‌ కూడా ఈ కేసులో అరెస్టు కాబోతున్నాడని వార్తలు వచ్చిన సంగతి తెలిసిందే. ఆ తర్వాత నాలుగురోజులుగా అంతా ప్రశాంతంగా కనిపిస్తున్నది గానీ.. ఇప్పుడు మత్తయ్యకు నోటీసులు వెళ్లాయి.
కానీ ఆయన మాత్రం, కేసీఆర్‌ మళ్లీ ప్రతీకార చర్యలకు దిగుతున్నారని, కోర్టు ఆదేశాల్ని ధిక్కరించి తనకు నోటీసులు ఇస్తున్నారని, తాను నోటీసులు తీసుకున్నప్పటికీ విచారణకు వెళ్లే ప్రసక్తే లేదని మత్తయ్య అంటున్నారు. ఈ మేరకు ఆయన ఏపీ పోలీసుల నుంచి రక్షణ కూడా కోరుతున్నారు. పనిలో పనిగా ఏపీలో అప్పట్లో తెలంగాణ సర్కారు అధికారులు ఇరుక్కునేలా పెట్టిన ఫోను ట్యాపింగ్‌ కేసుల్ని కూడా తెరమీదకు తెస్తున్నారు. అయితే తెలంగాణ ఏసీబీ నోటీసుల ప్రకారం మత్తయ్య విచారణకు రాకపోతే గనుక.. వివాదం మరింతగా ముదిరే ప్రమాదం కనిపిస్తోంది. ఏసీబీ దీనిని మరింత సీరియస్‌గా తీసుకనే అవకాశం ఉంది.
అయితే మత్తయ్య విచారణకు హాజరై సాంకేతికంగా జాగ్రత్తగా సమాధానలు ఇవ్వగలిగితే.. నిందితులకు లాభం జరగవచ్చుననే వాదనలు కూడా కొందరు న్యాయనిపుణులు చేస్తున్నారు. ముందుముందు ఈ వివాదం మరింత ముదిరే సంకేతాలు కనిపిస్తూ ఉండడంతో మత్తయ్య విచారణకు హాజరయ్యాడా? లేదా? అనేది చిన్న సంగతి గానీ.. తెదేపా ఎలా స్పందిస్తుందనేది కీలకంగా కనిపిస్తోంది.
