తెలంగాణ‌లో కేసీఆర్ ప్ర‌భుత్వం ఈ మ‌ధ్య సంక్షేమ కార్య‌క్ర‌మాల‌పై మ‌రింత శ్ర‌ద్ధ పెడుతున్న సంగ‌తి తెలిసిందే. ఈ క్ర‌మంలోనే పెద్ద ఎత్తున ల‌బ్ధిదారుల‌కు పించెన్లు అందిస్తోంది. అయితే, టి. కాంగ్రెస్ లెక్క ప్ర‌కారం… ఈ పింఛెనుదారులందరినీ తెరాస ఓటు బ్యాంకుగా చూస్తోంది. ఏదైతే కేసీఆర్ కి బ‌లం అవుతోందో, దాన్ని త‌మ‌కు అనుకూలంగా మార్చుకోవ‌డంపై దృష్టిపెడుతోంది. ఇదే అంశమై మాజీ మంత్రి జీవ‌న్ రెడ్డి నేతృత్వంలో ఒక క‌మిటీ ఇటీవలే నివేదిక తయారు చేసి, పీసీసీ ముందుంచింది. పింఛెన్ దారుల‌ను పెద్ద ఎత్తున ఆక‌ర్షించ‌గ‌లిగితే… ఓటు బ్యాంకును అనూహ్యంగా పెంచుకోవ‌చ్చ‌నే అంచ‌నాకి ఉత్తమ్ కుమార్ రెడ్డి నేతృత్వంలోని నేత‌లు ఓ వ్యూహం సిద్ధం చేశారు.
ప్ర‌స్తుతం 65 ఏళ్లు నిండిన‌వారికే కేసీఆర్ స‌ర్కారు వృద్ధాప్య పింఛెను ఇస్తోంది. ఈ వ‌యసు 58కి త‌గ్గించాల‌ని కాంగ్రెస్ నిర్ణ‌యించింది. తాము అధికారంలోకి వ‌స్తే 58 నిండిన‌వాళ్లంద‌రికీ ఓల్డేజ్ పెన్ష‌న్ వ‌స్తుంద‌ని హామీ ఇవ్వ‌నున్నారు. దీంతో ఆ ఓటు బ్యాంకు త‌మ‌కు అనుకూలంగా మారుతుంద‌ని భావిస్తున్నారు. అంతేకాదు, ప్ర‌స్తుతం తెరాస ఇస్తున్న పెన్ష‌న్ రూ. 1000ని రూ. 2000ల‌కు పెంచ‌బోతున్న‌ట్టు కూడా ప్ర‌క‌టించారు. విక‌లాంగుల పెన్ష‌న్ల ప్ర‌స్తుతం రూ. 1500 ఇస్తోంది కేసీఆర్ స‌ర్కారు. దీన్ని కూడా రెండింత‌లు చేస్తామ‌ని ఉత్తమ్ అంటున్నారు. వీరితోపాటు చేనేత కార్మికులు, ఇత‌ర చేతి వృత్తుల వారికి ప్ర‌స్తుతం ఇస్తున్న పెన్ష‌న్ల‌ను డబుల్ చేస్తామ‌న్నారు. వృద్ధులు, వితంతువులు, చేనేత కార్మికులు, గీత కార్మికులు… ఇలా అంద‌రికీ పెన్ష‌న్ల‌ను భారీగా పెంచుతామ‌ని ఉత్తమ్ హామీ ఇచ్చారు.
తెలంగాణ‌లో టీపీసీసీలోగానీ, ఇత‌ర చోట్ల‌గానీ నిరుద్యోగులుగా న‌మోదు అయిన‌వారి సంఖ్య 15 ల‌క్ష‌ల‌కు పైచిలుకు ఉంద‌నీ, వీరిలో కొన్ని అర్హ‌త‌ల‌ను ప‌రిగ‌ణ‌న‌లోకి తీసుకుని ప‌ది ల‌క్ష‌లమంది నిరుద్యోగ యువ‌త‌కు నెల‌కు రూ. 3 వేల నిరుద్యోగ‌భృతి ఇస్తామ‌ని ఉత్తమ్ హామీ ఇచ్చారు! తాము అధికారంలోకి రాగానే ఓప‌క్క పెద్ద ఎత్తున ప్ర‌భుత్వోద్యోగాల నియామ‌కాలు చేప‌డుతూనే, ఇంకోప‌క్క ఈ కార్య‌క్ర‌మం కూడా ఉంటుంద‌ని ఉత్తమ్ చెప్పారు. మొత్తానికి, పెన్ష‌న్ల‌నే ప్ర‌ధానాస్త్రంగా మార్చుకునేందుకు ఉత్తమ్ వ్యూహాత్మ‌కంగా హామీలు ఇస్తున్నారు. వీటినే ప్ర‌ధాన ప్ర‌చారాస్త్రాలుగా ప్ర‌జ‌ల్లోకి తీసుకెళ్లాల‌ని భావిస్తున్నారు. ఈ హామీలు క‌చ్చితంగా ఆక‌ర్ష‌ణీయ‌మైన‌వే. కాక‌పోతే, కాంగ్రెస్ ఇవ్వ‌బోతున్న ఈ హామీల‌కు ప్ర‌జ‌ల నుంచి ఎలాంటి స్పంద‌న వ‌స్తుంద‌నేదే చూడాలి. దీనికి ధీటుగా కేసీఆర్ కూడా ఏదో ఒక‌టి చేస్తారు క‌దా!
