ఎన్నికలకు ముందు కాంగ్రెస్ అన్ని రకాల అస్త్రాలను ప్రయోగిస్తోంది. ఇప్పటికే రైతు, యూత్ డిక్లరేషన్లు ప్రకటించిన కాంగ్రెస్.. తాజాగా ఎస్సీ, ఎస్టీ డిక్లరేషన్ ను ప్రకటించింది. చేవెళ్లలో ఏర్పాటు చేసిన సభకు కాంగ్రెస్ అధ్యక్షుడు మల్లిఖార్జున్ ఖర్గే వచ్చారు. ఆయన సమక్షంలో రేవంత్ రెడ్డి.. ఎస్సీ, ఎస్టీలకు గుక్కతిప్పుకోలేనన్ని హామీలు ప్రకటించారు. దళిత బంధు పేరు మార్చేసి… అంబేద్కర్ అభయ హస్తం కింద రూ.12 లక్షలు ఇస్తామని ప్రకటించారు. టెన్త్ పాసైన ఎస్సీ, ఎస్టీ విద్యార్ధులకు రూ.10 వేలు , ఇంటర్ పాసైన ఎస్సీ, ఎస్టీ విద్యార్ధులకు రూ. 15 వేలు , డిగ్రీ పాసైన దళిత, గిరిజన విద్యార్ధులకు రూ.25 వేలు, పీజీ పూర్తి చేసిన ఎస్సీ, ఎస్టీ విద్యార్ధులకు రూ.లక్ష ఆర్థిక సాయం చేస్తామని భరోసా ఇచ్చారు. ఇళ్లు లేనివారికి ఇందిరమ్మ ఇళ్ల కింద ఆరు లక్షలు ఇస్తామన్నారు.
ఇక రిజర్వేషన్ల విషయంలోనూ ఉదారత చూపించారు. పద్దెనిమిది శాతం ఎస్సీ, పన్నెండు శాతం ఎస్టీ రిజర్వేషన్లు ఇస్తామని ప్రకటించారు. ఎస్సీ వర్గీకరణ కోసం పూర్తి స్థాయిలో ప్రయత్నిస్తామన్నారు. పోడు భూములపై ఎస్టీలకు పూర్తి హక్కులు ఇవ్వడంతో పాటు ఎస్టీ కార్పొరషన్ ను ఏర్పాటు చేసి యువతకు పాతిక లక్షల వరకు రుణాలు అందిస్తామన్నారు. ఇప్పటి వరకూ అటవీ ప్రాంతాల్లో ఉండే ఐటీడీఏలను మైదాన ప్రాంతాల్లోనూ ఏర్పాటు చేస్తామని హామీ ఇచ్చారు. కేసీఆర్ ప్రభుత్వం లాక్కున్న అసైన్డ్ భూములు వెనక్కి ఇచ్చేలా చూస్తామని హామీ ఇచ్చారు. అసైన్డ్ భూములకు యాజమాన్య హక్కులు కల్పిస్తామన్నారు. విదేశీ విద్యకు వెళ్లేవారికి అవసరమైనసాయం చేస్తామని హామీ ఇచ్చారు.
రేవంత్ ప్రకటించిన డిక్లరేషన్ అమలు చేసే గ్యారంటీ కాంగ్రెస్ పార్టీదని అధ్యక్షుడు ఖర్గే భరోసా ఇచ్చారు. ఎస్సీ ,ఎస్టీలకు ప్రభుత్వంపై అసంతృప్తి ఉందని ప్రచారం జరుగుతోంది. అందుకే కేసీఆర్ వారికి పెద్ద ఎత్తున పథకాలు ప్రవేశ పెట్టారని అంటున్నారు. అయితే వాటిని మించి పథకాలు ప్రకటించారు. కాంగ్రెస్ డిక్లరేషన్ ను దళితులు, గిరిజనులు ఎంత ఎక్కువ నమ్మితే అంతగా ఓట్ల వెల్లువ వ్సతుంది.
