అరవై ఏళ్ల కల నెరవేరింది. తెలంగాణ రాష్ట్రం ఏర్పడింది. ఉద్యమించిన పార్టీకే అధికారం వచ్చింది. అలాంటప్పుడు ఎలా ఉండాలి. ప్రతి క్షణం, ప్రతి అడుగు వడివడిగా అభివృద్ధి వైపు సాగిపోవాలి. తమకు వచ్చే ప్రతి పైసానూ సద్వినియోగం చేసుకుంటూ ప్రజలకు వీలైనంత మేలు చేయాలి. కానీ తెలంగాణ ప్రభుత్వం కొన్ని విషయాల్లో నత్తను తలపిస్తోంది. కేసీఆర్ భారీ పథకాలు, వేలకోట్లని పెద్ద పెద్ద మాటలు చెప్తారు. కానీ చిన్న చిన్న విషయాల్లో ప్రభుత్వ అలసత్వం వల్ల తెలంగాణ రాష్ట్రం కేంద్ర ప్రభుత్వ నిధులను నష్టపోయే ప్రమాదం ఉంది.
రాష్ట్రీయ ఉచ్ఛతర్ శిక్షా అభియాన్ అనే పథకాన్ని కేంద్రం ప్రారంభించింది. ఉన్నత విద్యాభివృద్ధి కోసం ఉద్దేశించిన పథకమిది. ప్రతి యూనివర్సిటీకి 25కోట్లు ఇస్తారు. విద్యార్థులకు మేలు చేసే పథకం. దీనికి సంబంధించిన విధి విధానాల రూపకల్పన, నియామకాల విషయంలో తెలంగాణ ప్రభుత్వం మీనమేషాలు లెక్కిస్తోంది. మరో వైపు ఏపీ ప్రభుత్వం 120 కోట్ల రూపాయలను తెచ్చుకుంది. ఈ ప్రాజెక్టు డైరెక్టరేట్ ను ఏర్పాటు చేయడానికే కేంద్రం 2 కోట్లు ఇస్తుంది. కానీ ఈ నియామకాన్ని ఇంకా ప్రకటించలేదు. ఏపీ ఈ పని ఎప్పుడో చేసింది. 2 కోట్లను సొంతం చేసుకుంది.
నాక్ బి గ్రేడ్ ఉన్న యూనివర్సిటీలకు కేంద్రం నుంచి నిధులు పొందడానికి కావాల్సిన కసరత్తు ఇంకా జరగలేదు. ఇందుకోసం తగిన సిబ్బందిని నియమించాలి. అది జరగలేదు. యూనివర్సిటీల్లో మౌలిక సదుపాయాలను మెరుగు పరచడం, విద్యార్థులకు ఇబ్బంది లేకుండా బోధనకు వసతులు సమకూర్చడానికి ఈ నిధులను కేంద్రం ఇస్తుంది. ఏపీ ప్రభుత్వం తన రాష్ట్రంలోని 59 నాక్ బి గ్రేడ్ గుర్తింపు గల కాలేజీలకు 118 కోట్ల రూపాయల కేంద్ర నిధులను పొందింది. విద్యార్థులకు మెరుగైన సౌకర్యాల కోసం ఆ నిధులను ఖర్చు పెడుతోంది. తెలంగాణలో అతీ గతీ లేదు.
ఈ పథకం కింద నిధులను పొందడానికి మార్చి వరకూ గడువుంది. నిజమే. కానీ అతి నిదానం వల్ల తాబేలు, కుందేలు కథలా మారే ప్రమాదముంది. అయినా, నోడల్ అధికారిని, సిబ్బందిని నియమించి ప్రతిపాదనలు తయారు చేయించి పంపడం అతి కష్టమైన పనేమీ కాదు. ప్రతిదానికీ ఏపీ కంటే మేమే గొప్ప అని చెప్పుకొనే తెలంగాణ సర్కారు, ఈ విషయంలో మాత్రం బాగా వెనకబడి పోయింది. సత్వరం కేంద్ర ప్రభుత్వ నిధులను తెచ్చుకుని, విద్యార్థులకు మెరుగైన సదుపాయాలను కల్పిస్తే తప్పేంది?
