ప్రీమియ‌ర్ షోలు, ఫ్యాన్స్ షోల‌కు చ‌మ‌ర‌గీతం పాడింది తెలంగాణ ప్ర‌భుత్వం. ఇది వ‌ర‌కు స్టార్ హీరో సినిమా వ‌స్తోందంటే, అర్థ‌రాత్రి షోల హంగామా ఉండేది. టికెట్ రేటు 1000 నుంచి 2000 ప‌లికేది. కానీ తెలంగాణ ప్ర‌భుత్వం మాత్రం ఇప్పుడు ఫ్యాన్స్ షోల‌కు అనుమ‌తులు ఇవ్వ‌డం లేదు. ప్ర‌స్తుతం సాహోకీ ఇదే ప‌రిస్థితి ఎదుర‌య్యేలా ఉంది. ఆంధ్ర‌లో రాత్రి 3 గంట‌ల‌కే ఫ్యాన్స్ షోలు వేసే అవ‌కాశం ఉంది. తెలంగాణ‌లో ఉద‌యం 8.45 వ‌ర‌కూ షో వేసే అవ‌కాశాలు లేవు. అయితే సాహో టీమ్ మాత్రం క‌నీసం 30 థియేట‌ర్ల‌లో ప్రీమియ‌ర్లు ప్ర‌ద‌ర్శించ‌డానికి అనుమ‌తులు పొంద‌డానికి తీవ్రంగా కృషి చేస్తోంది. విడుద‌ల‌కు ఒక్క రోజు ముందు అంటే 29వ తేదీన ఓ ప్రీమియ‌ర్ ఉండే అవ‌కాశాలున్నాయి. ఈ షో సినీ ప్ర‌ముఖులు, మీడియాకి ప‌రిమితం చేసే అవ‌కాశం ఉంది. ఫ్యాన్స్ షోలకు అనుమ‌తి లేక‌పోయినా, విడుద‌ల‌కు ఒక్క రోజు ముందు ప్రీమియ‌ర్ వేసుకునే ఛాన్స్ వుంది. ఫ్యాన్స్ షోల‌కు అనుమ‌తి ఇస్తే… ప్రీమియ‌ర్ ఉండ‌దు. ఒకవేళ ఫ్యాన్స్ షోలు వ‌ద్దంటే మాత్రం హైద‌రాబాద్‌లో ఒక రోజు ముందే సాహో షో ప‌డిపోతుంది.