‘సామ‌జ‌వ‌ర‌గ‌మ‌న’ పూర్తి క్లాస్ మెలోడీ. ఆ వెంట‌నే ‘రాములో రాములా’ దింపారు. అది పార్టీ పాట. మాంచి నాటు స‌రుకు. బ‌న్నీ డాన్సుల‌కు స్కోప్ ఉన్న పాట. ఇప్పుడు ‘అల.. వైకుంఠ‌పుర‌ములో’ నుంచి ముచ్చ‌ట‌గా మూడో పాట వ‌స్తోంది. ఈనెల 14న పాట‌కు సంబంధించిన టీజ‌ర్ విడుద‌ల చేస్తారు. 21న పూర్తి పాట బ‌య‌ట‌కు వ‌చ్చేస్తుంది. ఇదో ర్యాప్ సాంగ్‌. `డాడీ డాడీ` అంటూ మొద‌ల‌వుతుంది. మంచి డాన్సు బిట్టు. తెలుగులో ర్యాప్ గీతాలు చాలా త‌క్కువ. వేళ్ల‌మీద లెక్క‌పెట్టొచ్చు. స్టార్ హీరోల సినిమాల్లో ఇలాంటి ప్ర‌య‌త్నాలేం జ‌ర‌గ‌లేదు. కానీ త్రివిక్రమ్ సినిమా క‌దా, పాట‌లు కూడా కొత్త కోణంలో ఉంటాయి. అందుకే ఈ ప్ర‌య‌త్నం చేశారు. ‘అల వైకుంఠ‌పుర‌ములో’ తొలి టీజ‌ర్ లో మంచి మ్యూజిక్ బిట్ వినిపించింది. ఆ బిట్టు… ఈ పాట‌లోనిదే. ఒక్కో పాట ఒక్కోలా ఉండేట్టు జాగ్ర‌త్త ప‌డుతున్నాడు త్రివిక్రమ్. ఆయ‌న అంచ‌నాల‌కు త‌గ్గ‌ట్టుగానే మంచి బాణీల్ని స‌మ‌కూరుస్తున్నాడు త‌మ‌న్‌. ఈ సినిమాలోనే శ్రీ‌కాకుళ జాన‌ప‌ద గీతం ఉంద‌ని తెలుగు 360 ముందే చెప్పింది. ఆ పాట‌ని విడుద‌ల చేస్తారా, లేదంటే సినిమా వ‌చ్చే వ‌ర‌కూ దాస్తారా? అనేది చూడాలి.
అల వైకుంఠ‌పురం నుంచి తెలుగు ర్యాప్
