బండ్ల గణేష్ కి టెంపర్ సినిమా రచయిత వక్కంతం వంశీ కి మధ్య వివాదం నడుస్తోంది. తనకి చెల్లించాల్సిన డబ్బు విషయమై రచయిత కోర్ట్ కి వెళ్ళడం, ఇటీవల కోర్ట్ గణేష్ కి జైలు శిక్ష విధించడం, ఆపై గణేష్ బెయిల్ పై బయటికి రావడం తెలిసిందే. ఈ మొత్తం విషయం పై వివరణ లాంటి లేఖ ఒకటి బండ్ల గణేష్ వ్రాసారు. ఆ లేఖ యథాతథంగా –

“2015 ‘టెంపర్’ చిత్రం వివాదం ఇది. కోటి నాలుగు లక్షల రూపాయలకు ‘టెంపర్’ కథా హక్కులను రచయిత వంశీ నుండి కొనడం జరిగింది. సినిమా సూపర్ హిట్ అయిన తరువాత హిందీ రీమేక్ హక్కులను దర్శక నిర్మాత అయిన రోహిత్ సెట్టికి సంయుక్తంగా విక్రయించాము. కానీ నాకు తెలియకుండా ‘టెంపర్’ కథను ఇంగ్లీష్ నవల హక్కుల వారికి రచయిత వంశీ అమ్మాడు. దీనివలన నేను తీవ్ర మనస్తాపానికిలోనై ఈ విషయాన్ని సినీ ఛాంబర్ దృష్టికి తీసుకు వచ్చాను. అదే సమయంలో ‘టెంపర్’ చిత్ర కథకి ఇచ్చిన బ్యాలన్స్ డబ్బుల చెక్‌ను నిలిపివేశాను. ఈ వివాదం ఫిల్మ్ ఛాంబర్‌లో ఉన్నప్పటికీ వంశీ చెక్‌ను పట్టుకొని కోర్టుకి వెళ్లాడు. నేను కొంత ఉపేక్షించటం వల్ల కోర్టువారు తుది తీర్పును ఇవ్వటం జరిగింది. అది తెలిసిన నేను కోర్టు ద్వారా బెయిల్ పొందాను. ఈ విషయంపై ఉన్నత న్యాయ స్థానానికి అప్పీల్‌కు వెళ్తున్నాను. రచయిత వంశీపై నా న్యాయ పోరాటం సాగిస్తాను. ‘టెంపర్’ సినిమాకు అద్భుతంగా మాటలు రాసి కథను విస్తృత పరిచిన శక్తి ఎవరో, ఏమిటో నాకు, నా సినిమా యూనిట్ సహాయ రచయితలకు, వంశీ మనస్సాక్షికి తెలుసు. సినిమా రంగంలో నటులకు, దర్శకుల, సాంకేతిక నిపుణులకు కోట్ల రూపాయలు చెల్లించిన నేను తొమ్మిది లక్షల రూపాయల చెల్లించలేని స్థితిలో లేనా? నా అభిమానులు, ఆత్మీయులు అర్థం చేసుకొనగలరు.

మీ బండ్ల గణేష్.”