నంద‌మూరి బాల‌కృష్ణ‌ని ఎలా చూపించాలో, బాల‌య్య‌ని వంద‌కి వంద శాతం ఎలా వాడుకోవాలో బోయ‌పాటి శ్రీ‌నుకి బాగా తెలుసు. సింహా, లెజెండ్, అఖండ… ఇలా ఒక‌దాన్ని మించి మ‌రో సినిమా విజ‌యాన్ని అందుకొందంటే కార‌ణం అదే. అఖండ అయితే, గ‌త చిత్రాల రికార్డుల‌న్నీ బ్రేక్ చేసింది. బాల‌య్య న‌ట‌న, డైలాగులు, యాక్ష‌న్ ఎపిసోడ్లు ఈ చిత్ర విజయంలో కీల‌క పాత్ర పోషించాయి. దాంతో పాటు త‌మ‌న్ సంగీతం కూడా. త‌మ‌న్ ఇచ్చిన బ్యాక్ గ్రౌండ్ స్కోరుకు థియేట‌ర్లో అభిమానుల‌కు పూన‌కాలు వ‌చ్చేశాయి. త‌న బీజియంల ఎఫెక్టుకు బాక్సులు కూడా బ‌ద్ద‌లైపోయాయి. ఇప్పుడు అఖండ 2 మొద‌లైంది. ‘తాండ‌వం’ అనేది ట్యాగ్ లైన్‌. ఈ చిత్రం ఈరోజు ఉద‌య‌మే హైద‌రాబాద్ లో లాంఛ‌నంగా ప్రారంభ‌మైంది. ఈ సంద‌ర్భంగా టైటిల్ ప్రోమోని విడుద‌ల చేసింది చిత్ర‌బృందం.
ప్రోమోలో విజువ‌ల్స్ అన్నీ చూసిన‌వే అయినా, ఈ ప్రోమో కూడా త‌మ‌న్ ఇచ్చిన ఆర్‌.ఆర్‌… నెక్ట్స్ లెవ‌ల్ లో ఉంది. ‘శివా..’ అంటూ వినిపించిన కోర‌స్‌… పూన‌కాలు తెప్పించేలా సాగింది. టైటిల్ ప్రోమోకే ఇంత ఎఫెక్ట్ ఇస్తే, ఇక థియేట‌ర్లో త‌మ‌న్ అభిమానుల చేత ఇంకెంత ర‌చ్చ చేయిస్తాడో అనిపిస్తోంది. ‘అఖండ’లో న‌టించిన తారాగ‌ణ‌మంతా ‘అఖండ 2’లోనూ ఉండ‌బోతోంది. దాంతోపాటు కొన్ని మెరుపులు కూడా తోడ‌వ్వ‌బోతున్నాయ‌ని టాక్‌. ప్ర‌గ్యా జైస్వాల్ ఓ క‌థానాయికగా న‌టిస్తోంది. మ‌రో నాయిక‌కూ చోటుంది. ఆమె ఎవ‌ర‌న్న‌ది త్వ‌ర‌లో తెలుస్తుంది. ప్ర‌స్తుతం బాల‌కృష్ణ బాబీ సినిమాతో బిజీగా ఉన్నాడు. డిసెంబ‌రు వ‌ర‌కూ బాబీ సినిమాకు సంబంధించిన వ‌ర్క్ ఉంటుంది. ఈలోగానే ‘అఖండ 2’కి సంబంధించిన కొన్ని స‌న్నివేశాలు తెర‌కెక్కించే అవ‌కాశం ఉంది. బాబీ సినిమాతో పాటు, బోయ‌పాటి సినిమాకూ బాల‌య్య కొన్ని డేట్లు ఇస్తాడ‌ని స‌మాచారం. 14 రీల్స్ సంస్థ ఈ చిత్రాన్ని తెర‌కెక్కిస్తున్న సంగ‌తి తెలిసిందే.
