షార్ట్ ఫిల్మ్స్ నేప‌థ్యం నుంచి వ‌చ్చిన ద‌ర్శ‌కుల‌కు చాలా విభాగాల‌పై ప‌ట్టుంటుంది. కెమెరా, ఎడిటింగ్‌, యాక్టింగ్‌.. ఇలా ఏం కావాలంటే అది చేసేస్తుంటారు. త‌రుణ్ భాస్క‌ర్ కూడా అదే బాప‌తు. త‌ను కూడా షార్ట్ ఫిల్మ్ బ్యాచే. త‌న‌లో ద‌ర్శ‌కుడే కాదు, న‌టుడు కూడా ఉన్నాడ‌ని `ఫ‌ల‌క్‌నుమా దాస్‌` చూస్తే అర్థ‌మైపోయింది. `మీకు మాత్ర‌మే చెప్తా`తో ఏకంగా హీరో అవ‌తార‌మే ఎత్తేశాడు. ఇప్పుడు ఎడిట‌ర్‌గా మారి క‌త్తెర ప‌ట్టాడు. త‌న సినిమా కోసం కాదు. త‌న స్నేహితుల కోసం.

సుజోయ్‌, సుశిల్ ద‌ర్శ‌కత్వం వ‌హించిన సినిమా ‘ప్రెజెర్ కుక్క‌ర్‌’. ఈ సినిమా ఇటీవ‌లే త‌రుణ్ భాస్కర్ చూశాడ‌ట‌. త‌న‌కు చాలా బాగా న‌చ్చింద‌ట‌. అందుకోసం ఈ సినిమా టీజ‌ర్‌ని త‌న వెర్ష‌న్‌లో క‌ట్ చేసి ఇస్తా.. అని ద‌ర్శ‌కుల్ని అడిగాడ‌ట‌. వాళ్లు ఓకే అనేశారు. దాంతో త‌రుణ్ భాస్క‌ర్ ఎడిట‌ర్‌గా కూడా మారి, ఓ టీజ‌ర్ క‌ట్ చేశాడు. అది త్వ‌ర‌లోనే విడుద‌ల కానుంది. ఓ ద‌ర్శ‌కుడు మ‌రో సినిమా టీజ‌ర్ క‌ట్ చేయ‌డం నిజంగా కొత్త విష‌య‌మే. మ‌రి… త‌రుణ్ భాస్క‌ర్ క‌త్తెర క్రియేటివిటీ ఎలా ఉంటుందో తెలియాలంటే ఇంకొద్ది రోజులు ఆగాలి.